Biyl qazaqstandyqtar tólqujatty onlain formatta qaita rásimdei alady. Bul týraly tsifrlyq damý, innovatsiialar jáne aeroǵarysh ónerkásibi birinshi vitse-ministri Rostislav Koniashkin málimdedi, dep habarlaidy Dalanews.kz.
Ótken jyly qazaqstandyqtar úshin jeke kýálikti onlain túrde qaita rásimdeý qyzmeti qoljetimdi bolǵan edi. Endi osyndai múmkindik tólqujattarǵa da engizilmek.
«Biyl osy qyzmetti onlain formatta keńeitýdi josparlap otyrmyz, bul máseleni IIM-men birlesip, tólqujattar boiynsha pysyqtap jatyrmyz. Qazirgi tańda biz qujatty qaita rásimdeý baǵytymen kele jatyrmyz, sebebi qujatty alǵash ret berý - óte sezimtal protsess. Ideal jaǵdaida adamnyń bul qyzmetti shynymen ózi alyp jatqanyn kózbe-kóz tekserýimiz qajet: fotosýretke túsirý, qoltańba alý jáne ózge de talaptar bar», - dedi Rostislav Koniashkin úkimettegi brifing barysynda.
Vitse-ministr naqty merzimdi atamady, alaida qyzmet 2026 jyl ishinde qoljetimdi bolatynyn aitty.
«Nege biz bul iske kezeń-kezeńimen kelip otyrmyz? Sebebi protsestiń azamattarǵa yńǵaily, qaýipsiz ári shynymen tiimdi jumys isteitinine kóz jetkizýimiz kerek», - dep túsindirdi ol.
Sheneýnik qazaqstandyqtardyń júrgizýshi kýáligin onlain rásimdeý múmkindigi burynnan bar ekenin de eske saldy. Bul qyzmetti aldaǵy ýaqytta tolyqtai onlain formatqa kóshirý josparlanyp otyr. Degenmen, HQKO-ǵa jeke baryp qyzmet alǵysy keletinder úshin bul múmkindik saqtalady.
«Bul azamat HQKO-ǵa ózi kelse, ony qýyp jiberedi nemese qyzmet kórsetpeidi degen sóz emes. Bizdiń qyzmetkerler ne eGov Mobile mobildi qosymshasyn ornatyp beredi, ne bolmasa ózin-ózi qyzmet kórsetý aimaǵyna aparyp, qyzmetti onlain formatta qalai alýǵa bolatynyn túsindirip beredi», - dedi Koniashkin.
Jasandy intellekt ministrliginde qazaqstandyqtar ýaqyt óte kele qyzmetter men qujattardy rásimdeýdiń onlain formatyna ózderi birtindep tolyq kóshedi dep kútýde.
«Biz úirengen HQKO-lar birtindep ózgeredi. Birden aitaiyn, bul tez júretin protsess emes. Ár túrli sanattaǵy azamattardyń suranysy árqalai ekenin eskerýimiz kerek. Qazirdiń ózinde qyzmetti onlain alýǵa yńǵaily dep sanaityndar bar - olar bul múmkindik eGov Mobile qosymshasynda, eGov portalynda nemese ekinshi deńgeili bankterdiń platformalarynda bolsa, HQKO-ǵa barmaidy. Al keibir azamattar onlain alýǵa múmkindik bola tura, báribir HQKO-ǵa kelgisi keledi. Operator kómekteskenin qalaidy - olarǵa solai senimdirek, tynysh», - dep qosty ol.
Vitse-ministr úirenshikti HQKO-lardyń «belgili bir bóligi» saqtalatynyn da atap ótti.
