Astana qalasynyń qylmystyq ister jónindegi mejraiondyq sotynda elorda turǵynyna úkim shyǵaryldy. 40 jastaǵy er adamǵa qatysty qylmystyq is qozǵalýyna WhatsApp tobynda joldaǵan eki aýdiohabary sebep bolǵan, dep habarlaidy Dalanews.kz.
Sot materialdaryna sáikes, ótken jyldyń qyrkúiek aiynda elorda turǵyny jataqhanadaǵy bólmesinde syra iship otyryp, WhatsApp tobyndaǵy habarlamalardy oqyǵan. Atalǵan top negizinen júk kóligi júrgizýshilerinen quralǵan jáne júk tasymalyna qatysty aqparat almasýǵa arnalǵan.
Sol kúni júrgizýshiler elordaǵa kireberiste iske qosylǵan avtomattandyrylǵan kólik tarazysy júiesine narazylyq bildirip jatqan. Bul másele boiynsha túrli pikir aitylǵan: biri júk tasymalyn múlde toqtatýdy usynsa, endi biri qyzmet qunyn kóterýdi talap etken. Al bul iske qatysty aiyptalǵan azamat máseleni radikaldy jolmen sheshýdi usynǵan: júk kólikterine otyryp, úkimet ǵimarattary ornalasqan aýdanǵa baryp, joldardy jaýyp tastaý. Sonymen qatar, eki aýdiohabarlamasynda qarý alyp shyǵý qajet ekenin de aitqan.
Araǵa 15–20 minýt salyp, er adam sózderiniń orynsyz ekenin túsinip, aýdiojazbalardy óshirip, uiyqtap qalǵan. Biraq sol túni onyń úiine politsiia kelip, ony bólimshege alyp ketken. Keiin belgili bolǵandai, bul topta júk júrgizýshilerinen bólek, baqylaýmen ainalysatyn jedel qyzmet ókili de bolǵan. Politsiia qyzmetkeri aýdiojazbalardy tyńdap, saqtap úlgergen.
Aldymen er adamǵa qatysty ákimshilik is qozǵalyp, 15 táýlikke qamaldy. Keiinnen qylmystyq is te tirkelgen.
Sotta aiyptalýshy kinásin tolyq moiyndap, istegen isine ókinetinin aityp, mundai áreketti qaitalamaitynyna ýáde bergen. Ol aýdiohabarlamalardy mas kúiinde, emotsiiaǵa berilip jibergenin túsindirip, zańsyz mitingke, búlikke nemese bilik ókilderine kúsh qoldanýǵa shaqyrý nieti bolmaǵanyn aitqan. Alaida sot taǵaiyndaǵan psihologiialyq-filologiialyq saraptama bul sózderdiń qarýly áreketke itermeleitin tildik qurylymdar baryn dáleldegen.
Úkim
Nátijesinde sot azamatty Qylmystyq kodekstiń 272-baby 3-bóligi boiynsha («Bilik ókilderiniń zańdy talaptaryna baǵynbaýǵa, jappai tártipsizdikke nemese azamattarǵa kúsh qoldanýǵa shaqyrý») kináli dep tanyp, 2,5 jyl merzimge bostandyǵyn shekteý jazasyn taǵaiyndady.
Úkim shyǵarý kezinde sot aiyptalýshynyń qaitys bolǵan baýyrynyń eki kishkentai balasyn asyrap otyrǵanyn, jaǵymdy minezdemelerin jáne jasaǵan isine shyn ókinetinin eskergen.
