استانا قالاسىنىڭ قىلمىستىق ىستەر جونىندەگى مەجرايوندىق سوتىندا ەلوردا تۇرعىنىنا ۇكىم شىعارىلدى. 40 جاستاعى ەر ادامعا قاتىستى قىلمىستىق ءىس قوزعالۋىنا WhatsApp توبىندا جولداعان ەكى اۋديوحابارى سەبەپ بولعان، دەپ حابارلايدى Dalanews.kz.

سوت ماتەريالدارىنا سايكەس، وتكەن جىلدىڭ قىركۇيەك ايىندا ەلوردا تۇرعىنى جاتاقحاناداعى بولمەسىندە سىرا ءىشىپ وتىرىپ، WhatsApp توبىنداعى حابارلامالاردى وقىعان. اتالعان توپ نەگىزىنەن جۇك كولىگى جۇرگىزۋشىلەرىنەن قۇرالعان جانە جۇك تاسىمالىنا قاتىستى اقپارات الماسۋعا ارنالعان.

سول كۇنى جۇرگىزۋشىلەر ەلورداعا كىرەبەرىستە ىسكە قوسىلعان اۆتوماتتاندىرىلعان كولىك تارازىسى جۇيەسىنە نارازىلىق ءبىلدىرىپ جاتقان. بۇل ماسەلە بويىنشا ءتۇرلى پىكىر ايتىلعان: ءبىرى جۇك تاسىمالىن مۇلدە توقتاتۋدى ۇسىنسا، ەندى ءبىرى قىزمەت قۇنىن كوتەرۋدى تالاپ ەتكەن. ال بۇل ىسكە قاتىستى ايىپتالعان ازامات ماسەلەنى راديكالدى جولمەن شەشۋدى ۇسىنعان: جۇك كولىكتەرىنە وتىرىپ، ۇكىمەت عيماراتتارى ورنالاسقان اۋدانعا بارىپ، جولداردى جاۋىپ تاستاۋ. سونىمەن قاتار، ەكى اۋديوحابارلاماسىندا قارۋ الىپ شىعۋ قاجەت ەكەنىن دە ايتقان.

اراعا 15–20 مينۋت سالىپ، ەر ادام سوزدەرىنىڭ ورىنسىز ەكەنىن ءتۇسىنىپ، اۋديوجازبالاردى ءوشىرىپ، ۇيىقتاپ قالعان. ءبىراق سول ءتۇنى ونىڭ ۇيىنە پوليسيا كەلىپ، ونى بولىمشەگە الىپ كەتكەن. كەيىن بەلگىلى بولعانداي، بۇل توپتا جۇك جۇرگىزۋشىلەرىنەن بولەك، باقىلاۋمەن اينالىساتىن جەدەل قىزمەت وكىلى دە بولعان. پوليسيا قىزمەتكەرى اۋديوجازبالاردى تىڭداپ، ساقتاپ ۇلگەرگەن.

الدىمەن ەر ادامعا قاتىستى اكىمشىلىك ءىس قوزعالىپ، 15 تاۋلىككە قامالدى. كەيىننەن قىلمىستىق ءىس تە تىركەلگەن.

سوتتا ايىپتالۋشى كىناسىن تولىق مويىنداپ، ىستەگەن ىسىنە وكىنەتىنىن ايتىپ، مۇنداي ارەكەتتى قايتالامايتىنىنا ۋادە بەرگەن. ول اۋديوحابارلامالاردى ماس كۇيىندە، ەموسياعا بەرىلىپ جىبەرگەنىن ءتۇسىندىرىپ، زاڭسىز ميتينگكە، بۇلىككە نەمەسە بيلىك وكىلدەرىنە كۇش قولدانۋعا شاقىرۋ نيەتى بولماعانىن ايتقان. الايدا سوت تاعايىنداعان پسيحولوگيالىق-فيلولوگيالىق ساراپتاما بۇل سوزدەردىڭ قارۋلى ارەكەتكە يتەرمەلەيتىن تىلدىك قۇرىلىمدار بارىن دالەلدەگەن.

ۇكىم

ناتيجەسىندە سوت ازاماتتى قىلمىستىق كودەكستىڭ 272-بابى 3-بولىگى بويىنشا («بيلىك وكىلدەرىنىڭ زاڭدى تالاپتارىنا باعىنباۋعا، جاپپاي تارتىپسىزدىككە نەمەسە ازاماتتارعا كۇش قولدانۋعا شاقىرۋ») كىنالى دەپ تانىپ، 2،5 جىل مەرزىمگە بوستاندىعىن شەكتەۋ جازاسىن تاعايىندادى.

ۇكىم شىعارۋ كەزىندە سوت ايىپتالۋشىنىڭ قايتىس بولعان باۋىرىنىڭ ەكى كىشكەنتاي بالاسىن اسىراپ وتىرعانىن، جاعىمدى مىنەزدەمەلەرىن جانە جاساعان ىسىنە شىن وكىنەتىنىن ەسكەرگەن.