Qazaqstandyq shahmatshylar alǵash ret Ulybrıtanıa Parlamentinde mach ótkizdi

Aqtoty Japatova 12 maý. 2025 09:39

Ulybrıtanıa Parlamentiniń ǵımaratynda biregeı shahmat machy ótti. Qazaqstan quramasy Lordtar palatasynyń músheleri jáne Vestmınster qyzmetkerlerimen saıysqa tústi. Bul týraly Qazaqstan shahmat federasıasynyń (KazChess) baspasóz qyzmeti málim etti,- dep habarlaıdy Dalanews.kz

Bul – shetel sportshylary qatysqan, osyndaı joǵary saıası deńgeıde alǵash ret ótken shahmat oıyny.

Mach Ulybrıtanıadaǵy Qazaqstan Elshiliginiń bastamasymen jáne Qazaqstan shahmat federasıasynyń (KazChess) qoldaýymen uıymdastyryldy. Qazaqstan delegasıasynyń quramynda eldiń jetekshi grosmeısterleri boldy:

Qazybek Nógerbek
Álisher Súleımenov
Ksenıa Balabaeva
Gúlmıra Dáýletova
Darmen Sadýaqasov

Qarsylastar ta osal bolmady: brıtandyq komanda músheleri İ razrád pen sport sheberligine úmitker deńgeıin kórsetti. Ulybrıtanıa quramasy tómendegi shahmatshylardan turdy:

Jamie Njoku-Goodwin – burynǵy premer-mınıstr Rıshı Sýnaktyń strategıalyq dırektory
Lord Harold Carter
Lord Patrick Lawrence
Lord Dafyyd Wigley
Chris Fegan – parlament qyzmetkeri, brıtandyq taraptyń eń myqty oıynshysy, ol Álisher Súleımenovke qatań qarsylyq kórsetti.

Mach aıaqtalǵan soń Qazaqstan delegasıasy Vestmınster boıynsha ekskýrsıaǵa shaqyryldy. Shahmatshylar eńbek naryǵy máselelerine arnalǵan jumys tobynyń otyrysyna qatysyp, jasandy ıntellekttiń qarqyndy damýy aıasynda búkil álemdi tolǵandyryp otyrǵan taqyryppen tanysty.

Parlamentke sapar – Qazaqstan delegasıasynyń jalǵyz maqsaty emes. Shahmatshylar Londonǵa rapıd jáne blıs boıynsha Komandalyq álem chempıonatyna (2025 FIDE World Rapid & Blitz Team Championships) qatysý úshin keldi. Bul týrnır 10-16 maýsym aralyǵynda ótedi. KazChess komandasy quramynda bes qazaqstandyq sportshy óner kórsetedi, al jalpy Qazaqstan shahmatshylary úsh komandanyń – KazChess, Barys jáne Rookies – sapynda qatysady.

KazChess quramy:

Aldıar Ańsat (2489)
Merýert Qamalıdenova (2330)
Elnaz Qalıahmet (2218)
Darmen Daýren (1932)
Darmen Sadýaqasov (2587, rapıd)
Rıhard Rapport (2714, №27)
Parham Magsýdlý (2691, №38)
Andreı Esıpenko (2689, №39)
Aleksandr Grıshýk (2667, №57)

Komanda kapıtany – KazChess atqarýshy dırektory Gúlmıra Dáýletova.

Chempıonat klýbtyq formatta ótýde. Olımpıadalar men ulttyq birinshilikterden aıyrmashylyǵy – munda komandalar federasıalar men seriktester nemese tikeleı demeýshiler tarapynan jasaqtalady. Londonda Úndistan, Ózbekstan, Germanıa, Ulybrıtanıa, Qazaqstan jáne basqa elderdiń komandalary baq synaıdy.