Ataýy estigen qulaqty eleń etkizerlik. Jabaiy tabiǵatty jany súietin jandar úshin taptyrmas meken Raiymbek aýdanynda ornalasqan. Jeke aýdan mártebesin alǵan óńirdiń kelbeti 3 jyl ishinde aitarlyqtai ózgergen. Onyń ishinde ólkeniń ishki týrizmin erekshe atap ótken jón.
Aýdan taýly aimaq bolǵandyqtan týrizmdi damytýǵa qolaily. Bul mańda 5 demalys orny naqty jumys jasap jatyr. Olar: «Safari Taý Shelek» JShS, «Qarasai» jailaýy, «Úshqaqbaq», «Shoǵan sai», «Aqkól».
Osylardyń qatarynda ózgeden daralanyp turǵan, týristerdiń qyzyǵýshylyǵyn týdyryp otyrǵan oryn – «Safari Taý Shelek».
2018 jyldan bastap jumysyn bastaǵan demalys orny endi ǵana aiaǵynan turyp kele jatyr. Taý shatqaldary qorshaǵan mekenniń tumsa tabiǵaty tańqalarlyq. Desede, bul mańdy týrister keletin orynǵa ainaldyrý ońaiǵa soqpaǵan.
Jer telimin rásimdeý, Safariǵa aparatyn joldy jóndeý, 12, 8, 6 qanatty qazaq úilerdi ornatý tilge jeńil bolǵanymen is júzinde bir atanǵa artar júkke teń edi. Týǵan topyraqtyń tósinde mańdai terim qalsyn degender belsene kiristi, nátijesinde máseleniń túiinin tarqatty.
Sondai-aq, bul mańda «Kúrkildek» sarqyramasy bar. 10 metr biiktikten qulap aǵatyn aǵyn sýdyń aryny qatty. Taý shatqalynda ornalasqan jerge kólikpen jáne atpen jetýge bolady. Tańdaý kelýshilerdiń óz qalaýynda. «Safari Taý Shelekte» etnoaýyl, interańshylyq, atpen jáne jaiaý serýendeý jolǵa qoiylǵan.
– Osy jer meniń atalarymnyń tabany tigen meken. Menińde balalyq shaǵym osynda ótti. Etonaýyl ashyp, týristerdi shaqyryp, nege qonaq kútpeske degen oi keldi. Sol armandy júzege asyrdyq. Orta eseppen munda aptasyna 25-30 kólik keledi. Sonda 100 adamnan asady kelýshiler sany.Áli de mańaiymyzdy keńitip, jatar oryndardyń sanyn kóbeitý josparlanǵan. Aldaǵy ýaqytta 6,8 qanatty qazaq úiler ár apta saiyn alyp kelinedi dep kútip otyrmyz, – deidi «Safari Taý Shelek» JShS direktory Azat Samatuly.
Demalys aimaǵynyń basshysynyń sózine súiensek, endigide 50 bas qodas Qyrǵyzstannan alyp kelinbek. Qazirgi kezde olardyń kútimi, ósirý tásili, jersindirýine qatysty daiyndyq jumystary júrip jatyr eken. Demek, aldaǵy 2 jylda Qyrǵyzstan men Tibette meken etetin janýardy Ile Alataýynyń bókterinen kórýge múmkindik týmaq. Azat Samatulynyń aitýynsha, qodastardyń sanyn 2000-3000-ǵa deiin jetkizý kózdelgen.
– «Safari Taý Shelek» Raiymbek aýdanynyń ortalyǵyna 80 shaqyrym jerde ornalasqan. Búgingi tańda atalǵan orynǵa jetkizer joldyń sapasyn jaqsartý jumystary boiynsha josparlar qarastyrylýda. Jeke kásipkerler men ákimshiliktiń birlesken qyzmetiniń nátijesinde kórkem ólkege qatynar joldyń jaiy jaqsarady, – deidi Raiymbek aýdany ákimdigi kásipkerler bóliminiń basyshysy Abylai Baqytjan.
