Qazaqstandyq fýtbolshylar 70 myń dollarǵa deiin jalaqy alady
"Qazaqstandyq klýbtardyń biýdjeti bolgarlyq klýbtarǵa qaraǵanda áldeqaida joǵary. Onyń birneshe sebebi bar. Birinshiden, Qazaqstan shalǵaida ornalasqan el. Qomaqty qarajatsyz jaqsy oiynshylardy ol jaqqa tarta almaisyń. Eshkim Qazaqstanǵa barǵysy kelmeidi", - deidi S.Stoilov.
Onyń aitýynsha, eń úlken jalaqyny "Astana" men "Qairat" fýtbol klýbtarynyń oiynshylary alady eken. Ózge komandalardaǵy ailyq-jalaqylar shamamen deńgeiles.
"Shynymdy aitsam, bizdiń klýbtyń oiynshylary qansha jalaqy alatynyn naqty bilmeimin. Biraq, jaqsy oiynshylardyń jalaqylary joǵary, mysaly bolgarlyq "Lýdogorets" klýbyndaǵydai. Munda ailyq-jalaqy 20 myń dollardan bastalyp, 50-60 myń dollarǵa deiin jetedi, tipti, 70 myń alatyndary da bar. Men "Qairat" pen "Astana" klýbtary jaiynda aityp otyrmyn. Ózge komandalardaǵy jalaqy shamamen deńgeiles, 20-25 myń dollar kóleminde", - deidi bolgarlyq maman.
Onyń aitýynsha, qazaqstandyq klýbtardyń jalaqydan bólek shyǵyndary da tym úlken kórinedi.
"Fýtbolshylar óte kóp saparǵa shyǵady, ushaqpen kóp ushady. Janarmai shyǵyny orasan. Máselen, "Astananyń" Lissabonǵa ushyp barýy shamamen 500 myń dollardy qurady. Osylai. 4 kún sonda boldyq, 9 saǵat áýede ushtyq. Qonaq úi men ózge de shyǵyndar bólek tólenedi. Ishki chempionatta da barlyq oiyndarǵa ushaqpen barýǵa májbúrmiz, qalalardyń arasy tym shalǵai. Árbir qalaǵa baryp-kelýiń 2-3 kún ýaqytty alady, shyǵyn úlken. Onyń ústine, Qazaqstandaǵy fýtbolshylardyń 90 paiyzy Adidas kiimderimen oinasa, qalǵan 10 paiyzy Nike brendin tańdaǵan. Mine, tek kiim úshin ár klýb 200-300 myń eýroǵa shyǵyndalady", - dep atap ótti Stoilov «7 dni sport» portalyna bergen suhbatynda.
Mamannyń aitýynsha, "Astana" fýtbol klýbynyń jyldyq biýdjeti 30 million dollardy quraidy eken. Bul qarjynyń kóp bóligi jol shyǵyndaryna ketedi. Sondai-aq, almatylyq "Qairattyń" da jyldyq biýdjeti osy shamalas. Al, el chempionatyndaǵy ózge klýbtar bir jylda 10-20 million dollar arasynda shyǵyndalady.
