2026 jyldyń birinshi jartyjyldyǵynda respýblikalyq mańyzy bar avtojoldarda jol-kólik oqiǵalarynyń sany 9%-ǵa azaiyp, 1507-den 1371 jaǵdaiǵa deiin tómendedi, dep habarlaidy dalanews.kz.
Kólik ministrligi Avtomobil joldary komitetiniń málimetinshe, osy kezeńde joldardaǵy kólik qozǵalysynyń qarqyndylyǵy 37%-ǵa artyp, 22,3 mln kólikke jetken.
Vedomstvonyń deregine sáikes, jol-kólik oqiǵalarynyń 91%-y júrgizýshilerdiń jol qozǵalysy erejelerin óreskel buzýynan bolǵan. Apattardyń negizgi sebepteri retinde jyldamdyqty shamadan tys asyrý (33%), kólikti basqarýdy joǵaltý (14%), araqashyqtyqty saqtamaý (13%) jáne jol belgileriniń talaptaryn elemeý (10%) kórsetilgen.
Komitettiń málimetinshe, aqyly joldardyń jalpy uzyndyǵy 2,3 myń shaqyrymdy quraityn ýchaskelerinde ortasha jyldamdyqty baqylaý júiesi engizilgen. Nátijesinde osy jol bólikterindegi jol-kólik oqiǵalarynyń sany 17%-ǵa tómendegen.
Sońǵy bes jylda respýblikalyq joldardyń 11 myń shaqyrymynyń 45%-y I jáne II tehnikalyq sanatqa aýystyrylǵan. Sondai-aq tranzittik kólik aǵynyn eldi mekenderden shyǵarý úshin 65 ainalma jol men 38 jerústi jaiaý júrginshiler ótkeli salynǵan.
Budan bólek, jol qaýipsizdigin arttyrý maqsatynda joldaǵy ahýal men jyldamdyq rejimi týraly aqparat beretin elektrondy belgiler ornatylyp, 22 aqyly ýchaskede jyldamdyqty baqylaityn 56 lazerlik keshen jumys istep tur. Jyl saiyn 8 myńnan astam jol belgisi aýystyrylyp, jol tańbalary jańartylyp, baǵdarshamdar men jaiaý júrginshiler ótkelderi ornatylady.
Osyǵan bailanysty Avtomobil joldary komiteti júrgizýshilerdi jazǵy demalys maýsymynda jol qozǵalysy erejelerin saqtaýǵa, jyldamdyqty asyrmaýǵa, sharshaǵan kúide kólik tizginine otyrmaýǵa jáne balalardy tasymaldaý kezinde qaýipsizdik beldigi men arnaiy balalar qurylǵylaryn paidalanýǵa shaqyrdy.
