Ýkraina Kaspii qubyr konsortsiýmynyń terminaly arqyly Qazaqstan munaiyn tasymaldaǵan tankerlerge jasalǵan shabýyldarǵa qatysy joq ekenin málimdedi. Bul týraly Ýkrainanyń Qazaqstandaǵy elshisi Viktor Maiko The Times of Central Asia basylymyna bergen pikirinde aitty, dep habarlaidy dalanews.kz.
"Qazirgi ýaqytta bul shabýyldardy Ýkraina tarapy jasady degendi dáleldeitin eshbir derek joq. Sondyqtan Ýkrainaǵa tikelei nemese janama túrde asyǵys ári negizsiz aiyp taǵýdan bas tartýǵa shaqyramyn", – dedi Viktor Maiko.
Elshi Ýkraina biligi halyqaralyq seriktesterine buǵan deiin ýkrainalyq drondar paidalanylýy múmkin reseilik arandatýlar týraly eskertkenin de atap ótti. Onyń aitýynsha, Reseidiń radioelektrondyq kúres júieleri ýkrainalyq ushqyshsyz ushý apparattaryn ustap alyp, olardyń baǵytyn ózgerte alady. Osyǵan bailanysty Kiev mundai arandatý bolýy yqtimal degen nusqany muqiiat tekserý qajet dep sanaidy.
Maiko Ýkraina Qarýly kúshteri azamattyq nysandarǵa, sonyń ishinde Resei aýmaǵyndaǵy beibit infraqurylymǵa soqqy jasamaitynyn aitty. Onyń sózinshe, Ýkraina úshin zańdy nysana retinde tek áskeri obektiler men Reseidiń áskeri is-qimyldaryn qamtamasyz etetin infraqurylym qarastyrylady.
"Qazaqstan, onyń azamattary, infraqurylymy men ekonomikalyq múddeleri Ýkraina tarapynan eshqashan áskeri nysana retinde qarastyrylǵan emes jáne qarastyrylmaidy. Kaspii qubyr konsortsiýmynyń infraqurylymyna nemese Qazaqstan Respýblikasynyń basqa da ekonomikalyq jáne energetikalyq nysandaryna jasalǵan kez kelgen shabýyl Ýkrainanyń múddesine sai kelmeidi", – dedi diplomat.
Ol sondai-aq Ýkrainanyń Qazaqstandy dostas memleket ári Ortalyq Aziiadaǵy mańyzdy seriktes retinde baǵalaitynyn jetkizdi. Elshi eki el arasyndaǵy qarym-qatynas ózara qurmet pen syndarly dialog negizinde odan ári dami beretinine senim bildirdi.
Buǵan deiin Qazaqstannyń Syrtqy ister ministrligi KTK infraqurylymy arqyly munai tasymaldaǵan azamattyq kemelerge drondarmen jasalǵan shabýyldardy eldiń ekonomikalyq múddelerine nuqsan keltirý dep baǵalaǵan edi. Vedomstvo keltirilgen zalaldy eseptep, halyqaralyq quqyq normalaryna sáikes ótemaqy talap etý quqyǵyn ózinde qaldyratynyn málimdegen.
Kaspii qubyr konsortsiýmy – Qazaqstan munaiyn álemdik naryqqa shyǵarýdyń negizgi baǵyty. Eldiń munai eksportynyń 80 paiyzdan astamy osy júie arqyly tasymaldanady. Uzyndyǵy shamamen 1,5 myń shaqyrym bolatyn qubyr Batys Qazaqstandaǵy ken oryndaryn Qara teńiz jaǵalaýyndaǵy teńiz terminalymen bailanystyrady. Munai osy jerden tankerlerge tieledi. Konsortsiým aktsionerleriniń qatarynda Qazaqstan, Resei, amerikalyq Chevron kompaniiasy jáne ózge de halyqaralyq munai-gaz korporatsiialary bar.
