2026 jyly Qazaqstanda zeinetaqy men járdemaqy tólemderine 6,8 trillion teńge bólinýi josparlanyp otyr. Bul týraly Eńbek jáne halyqty áleýmettik qorǵaý ministrligi málimdedi, dep habarlaidy Dalanews.kz.
Ministrliktiń málimetinshe, respýblikalyq biýdjettiń jobasynda áleýmettik qoldaýǵa arnalǵan iri kólemdegi shyǵyndar qarastyrylǵan.
"2026 jylǵa arnalǵan respýblikalyq biýdjet jobasynda zeinetaqy men járdemaqylar túrindegi áleýmettik tólemderge jalpy 6,8 trillion teńge kóleminde shyǵyn kózdelgen", – delingen Tengrinews.kz redaktsiiasynyń resmi saýalyna joldanǵan jaýapta.
Salystyrmaly ósim:
2025 jylmen salystyrǵanda bul kórsetkish 14,4 paiyzǵa nemese 860,5 milliard teńgege artyq bolmaq.
Sonyń ishinde:
Zeinetaqy men járdemaqylardy indeksatsiialaýǵa – 622,6 mlrd teńge,
Alýshylar sanynyń artýyna – 237,9 mlrd teńge bólinbek.
2026 jyldyń 1 qańtarynan bastap 2,6 millionnan astam zeinetker men shamamen 2,3 million járdemaqy alýshy úshin zeinetaqy men járdemaqylar 10,5%-ǵa indeksatsiialanýy josparlanýda.
Indeksatsiia myna tólem túrlerin qamtidy:
- Eńbek jáne bazalyq zeinetaqylar;
- Múgedektikke jáne asyraýshysynan aiyrylýǵa bailanysty memlekettik áleýmettik járdemaqylar;
- Bala týýyna, 1,5 jasqa deiingi bala kútimine, múmkindigi shekteýli balasy bar ata-analar men qamqorshylarǵa, kópbalaly analar men otbasylarǵa arnalǵan járdemaqylar;
- Arnaiy memlekettik járdemaqylar;
- I toptaǵy múgedekterge kútim jasaityn adamdarǵa arnalǵan tólemder;
Zeinetkerler men áleýmettik tólem alýshylardy jerleýge arnalǵan járdemaqylar.
