Qazaqstanda zeinet jasy ázirge ózgerissiz qalady. Er adamdar 63 jasta, al áielder 61 jasta zeinetke shyǵady. Bul týraly "Biryńǵai jinaqtaýshy zeinetaqy qory" (BJZQ) málimdedi, dep habarlaidy Dalanews.kz.
Áielderdiń zeinet jasy 2027 jyldyń sońyna deiin burynǵy deńgeide saqtalady.
BJZQ málimetinshe, 2028 jyldan bastap áielderdiń zeinet jasy kezeń-kezeńimen ulǵaiady:
- 2028 jylǵy 1 qańtardan — 61,5 jasqa;
- 2029 jylǵy 1 qańtardan — 62 jasqa;
- 2030 jylǵy 1 qańtardan — 62,5 jasqa;
- 2031 jylǵy 1 qańtardan — 63 jasqa deiin.
Osylaisha, 2031 jyldan bastap áielder men erler úshin biryńǵai zeinet jasy — 63 jas bolyp bekitiledi.
Eske salaiyq, buǵan deiin Tsifrlyq damý, innovatsiialar jáne aeroǵarysh ónerkásibiniń birinshi vitse-ministri Qanysh Tóleýshin Úkimet otyrysynda tsifrlandyrý zeinetaqyny rásimdeý rásimin qalai jeńildete alatynyn aitqan edi.
Qanysh Tóleýshin elimizde zeinetaqyny elektrondyq formatta rásimdeý jobasynyń pilottyq rejimde iske asyrylyp jatqanyn jetkizdi.
"Buǵan deiin zeinetaqy taǵaiyndaý protsesi azamattardyń jeke qatysýyn talap etip, tólemderdi alý úshin birqatar qujattardy jinap, eńbek ótilin rastaý qajet bolatyn. Sonymen qatar, derekterdi qaǵaz júzinde óńdeý ýaqytty alyp, kezekter týdyratyn ári zeinetaqyny qolmen esepteý kezinde qatelikterge jol berý qaýpin arttyratyn. Búginde pilottyq rejimde túbegeili jańa tásil engizildi. Jasy boiynsha skoring negizinde júie zeinetaqy isin avtomatty túrde qalyptastyrady, eńbek ótili týraly málimetterdi tekseredi jáne azamat tarapynan ótinish túspesten tólemderdi belsendi túrde taǵaiyndaidy", – deidi vitse-ministr.
Onyń aitýynsha, mundai tásil qyzmet kórsetý merzimin 10-nan 1 kúnge deiin qysqartýǵa, rásimdik qadamdar sanyn 6-dan 1-ge deiin azaitýǵa jáne azamattar úshin protsesti aitarlyqtai jeńildetýge múmkindik beredi. Osyǵan bailanysty ol Eńbek jáne halyqty áleýmettik qorǵaý ministrligine jobany masshtabtaýdy qarastyrýdy usynady.
