Qazaqstanda jyl basynan beri stalking faktileri boiynsha qozǵalǵan 83 is sotqa joldanǵan. Bul týraly Ishki ister ministriniń orynbasary Sanjar Ádilov málimdedi, dep habarlaidy dalanews.kz.
49 adamǵa jábirlenýshige jaqyndaýǵa tyiym salyndy
Vitse-ministrdiń aitýynsha, stalking boiynsha quqyq buzýshylyq jasaǵan 49 adamǵa jábirlenýshilerge jaqyndaýǵa tyiym salý sharasy qoldanylǵan.
Sondai-aq neke qiiýǵa májbúrleý faktileri boiynsha qozǵalǵan 12 qylmystyq is boiynsha sheshim qabyldanǵan.
Sanjar Ádilovtyń sózinshe, mundai isterdiń edáýir bóligi qysqa merzimde qaralady. Bul jábirlenýshilerdiń buzylǵan quqyqtaryn qalpyna keltirýge jáne jazanyń bultartpastyǵy qaǵidatyn qamtamasyz etýge múmkindik beredi.
Stalkingpen kúres úshin qoǵamnyń qoldaýy qajet
Ishki ister ministriniń orynbasary stalking, neke qiiýǵa májbúrleý jáne áielderge qatysty zorlyq-zombylyq máselesin tek quqyq qorǵaý organdarynyń kúshimen sheshý múmkin emes ekenin atap ótti.
Onyń aitýynsha, bul úshin búkil qoǵamnyń kúsh-jigerin biriktirý qajet. Atap aitqanda, qoǵamdyq kózqarasty ózgertý, quqyqtyq mádenietti arttyrý jáne zorlyq-zombylyqtyń kez kelgen túrine tózbeýshilik qalyptastyrý mańyzdy.
Áielderge qatysty zorlyq-zombylyq úshin myńdaǵan adam jaýapqa tartylǵan
Sanjar Ádilov áielderge qatysty zorlyq-zombylyq faktileri boiynsha qabyldanǵan sharalar týraly da málimet berdi.
Onyń aitýynsha, 41 myńnan astam quqyq buzýshy ákimshilik jaýapkershilikke tartylǵan. 11 myńnan astam adamǵa ákimshilik qamaý jazasy taǵaiyndalǵan.
Sonymen qatar 35 myńnan astam qorǵaý nusqamasy shyǵarylǵan.
Stalking úshin qandai jaza qarastyrylǵan?
Eske salaiyq, 2025 jyly Qazaqstannyń Qylmystyq kodeksine «Stalking» týraly jańa 115-1-bap engizilgen bolatyn.
Atalǵan bap boiynsha kináli adamǵa 200 ailyq eseptik kórsetkishke deiin aiyppul salynýy múmkin. Sondai-aq túzeý jumystary, qoǵamdyq jumystar nemese 50 táýlikke deiin qamaýǵa alý jazasy kózdelgen.
Stalking – adamnyń sońyna túsip, mazasyn alý, ańdý, qorqytý nemese onyń qaýipsizdigine qaýip tóndiretin áreketterdi júieli túrde jasaý retinde qarastyrylady.
