Qazaqstanda tórtinshi bir uialy bailanys operatory paida bolýy múmkin. Bul týraly TsDIAÓM vitse-ministri Ashat Orazbek 21 qańtarda úkimette ótken brifing barysynda málimdedi, dep jazady Dalanews.kz.
Eger qoldanystaǵy bailanys operatorlary qazaqstandyqtardyń qyzmet kórsetý sapasyna jáne tarifter deńgeiine degen qajettilikterin qanaǵattandyra almasa, onda olardyń ornyn basqasy basýy múmkin. Biraq eki jyldan keiin.
Vitse-ministrdiń aitýynsha, qazirgi ýaqytta vedomstvo qatarlyq investorǵa Tele2 jáne Altel-di satý jónindegi mámilege "úlken úmit artyp otyr", sebebi bul qazaqstandyq bailanys operatorlary arasyndaǵy básekelestikti kúsheitýi tiis.
- Bul arada másele olardyń qandai qadamdar jasaityndyǵynda. Aldaǵy alty aida bul jaǵy anyq bolady dep oilaimyn. Eger eshqandai ózgeris bolmasa, bizde jańa operator úshin jiilik jolaqtary daiyn tur. Eki jyldan keiin qyzmet kórsetý sapasy qanaǵattyndyrylmasa, onda sony naryqqa shyǵarýǵa daiyn bolamyz, — dedi Ashat Orazbek.
Onyń pikirinshe, qazir qazaqstandyq operatorlar óz abonentteriniń suranystaryn eskere otyryp, naryqtaǵy pozitsiialaryn saqtap qalýǵa nazar aýdarýy qajet.
- Bizde uialy bailanys naryǵynda biraz ýaqyt dýopoliia bolyp keledi. Oligopoliia siiaqty dýopoliia da jaqsy nárse emes, sondyqtan jasalǵan mámileden biz úlken úmit artamyz, óitkeni biz tarifterdi rettei almaimyz. Biraq biz naryqtyń kórinbeitin qoly sanalatyn úsh táýelsiz uialy bailanys operatory arasyndaǵy ózara básekelestikke súienemiz, bul bailanys sapasyn arttyrady. Onyń baǵaǵa da áser etetinine senimdimiz. Esterińizde bolsa, alǵash Tele2 naryqqa shyqqan kezde olar tarifterin kúrt tómendetti, sodan keiin Kcell men Beelineda baǵany túsirýge májbúr boldy. Sondyqtan biz aldan osyndai nátije kútemiz, - dep atap ótti vitse-ministr.
Aita ketsek, "Qazaqtelekom" men PIH Communication LLC arasyndaǵy Tele2 jáne Altel uialy bailanys jelisin satý boiynsha mámile 2025 jyldyń 14 qańtarynda aiaqtaldy.
