2026 jyldyń 1 shildesinen bastap Qazaqstanda birneshe bank nemese mikroqarjy uiymy aldyndaǵy qaryzdy bir tólem arqyly óteýge múmkindik beretin jańa tsifrlyq platforma iske qosyldy. Bul týraly Qarjy naryǵyn retteý jáne damytý agenttigi habarlady, dep habarlaidy dalanews.kz.
Jańa júie Agenttik pen Birinshi kredittik biýronyń birlesken jobasy retinde bank jáne mikroqarjy ombýdsmandarynyń bazasynda ázirlengen. Endi birneshe kreditory bar azamattarǵa ár qarjy uiymymen jeke-jeke kelissóz júrgizýdiń qajeti joq. Olar bir ǵana ótinish berip, barlyq qaryz boiynsha biryńǵai tólem kestesin jasai alady. Qaryzdy óteý merzimi 5 jylǵa deiin, al áleýmettik osal sanattaǵy azamattar úshin 7 jylǵa deiin belgilenedi. Kelisim qoldanylǵan kezeńde qaryzdy májbúrlep óndirip alý toqtatylady.
Platformany kim paidalana alady?
Finkelisim.kz platformasyna myna talaptarǵa sai keletin azamattar ótinish bere alady:
- eki nemese odan da kóp bank, mikroqarjy uiymy nemese kollektor aldyndaǵy bereshegi 90 kúnnen astam merzimge keshiktirilgen bolýy;
- jalpy qaryz somasy 150-1600 AEK aralyǵynda bolýy (2026 jyly bul 648 750 teńgeden 6 920 000 teńgege deiin);
- atalǵan qaryzdar boiynsha sot sheshimi, notariýstyń atqarýshylyq jazbasy nemese májbúrlep óndirip alý sharalary bolmaýy.
Platforma tek kepilsiz tutynýshylyq nesielerge arnalǵan. Sondyqtan ipoteka, avtonesie, bizneske alynǵan qaryzdar, alaiaqtar rásimdegen nesieler nemese bankrottyq rásimindegi qaryzdar bul júiege engizilmeidi.
Ai saiynǵy tólem qalai esepteledi?
Ai saiynǵy tólem mólsheri men óteý merzimi jalpy qaryz kólemine qarai avtomatty túrde esepteledi. Jalpy sharttar boiynsha, eger qaryz kólemi 1 million teńgege deiin bolsa, ai saiynǵy tólem 84 myń teńgeden aspaidy jáne qaryz bir jyl ishinde óteledi.
Al jalpy bereshek 5-7 million teńge aralyǵynda bolsa, ai saiyn shamamen 117 myń teńgeden tólep, qaryzdy 5 jyl ishinde jabýǵa bolady.
Áleýmettik osal toptaǵy azamattar men ataýly áleýmettik kómek alýshylar úshin sharttar jeńildetilgen. Olar 1 million teńgege deiingi qaryzdy 1,5 jyl boiy aiyna 56 myń teńgeden ótei alady. Al 5-7 million teńge kólemindegi bereshek úshin ai saiynǵy tólem shamamen 84 myń teńgeni qurap, óteý merzimi 7 jylǵa deiin sozylady.
Ótinish berý tártibi
Platformany paidalaný úshin azamattar Finkelisim.kz saitynda tirkelip, mindetti biometriialyq sáikestendirýden ótýi tiis. Júie kredittik biýrolardan qajetti málimetterdi avtomatty túrde jinap, talaptarǵa sáikes kelgen jaǵdaida aqparatty barlyq kreditorlarǵa jiberedi.
Kelisim jasalǵannan keiin paidalanýshynyń jeke kabinetine mediativtik kelisimder men jańa tólem kestesi joldanady. Qujattarǵa 72 saǵat ishinde elektrondyq tsifrlyq qoltańba arqyly qol qoiý qajet. Belgilengen merzimde qol qoiylmasa, ótinishtiń kúshi joiylady.
Ujymdyq retteý rásimine qatysý qaryz alýshylar úshin tegin bolady. Tek mediator qyzmeti aqyly. Alaida 2027 jyldyń 1 qańtaryna deiin bul shyǵyndardy bank jáne mikroqarjy ombýdsmandary óteidi.
Qujattarǵa qol qoiylǵannan keiin qaryz alýshy ai saiyn bir ǵana tólem jasaidy, al platforma qarajatty barlyq kreditor arasynda avtomatty túrde bóledi.
