Májilis «Topyraqty qorǵaý týraly» depýtattyq zań jobasyn jáne oǵan ilespe túzetýlerdi birinshi oqylymda maquldady, dep habarlaidy dalanews.kz.
«Topyraqty qorǵaý týraly» depýtattyq zań jobasyn jáne oǵan ilespe túzetýlerdi birinshi oqylymda maquldady. Qujattyń negizgi maqsaty - biryńǵai zańnamalyq akt aiasynda topyraqty basqarý, ony qorǵaý, qunarlylyǵyn saqtaý men arttyrý, sondai-aq jerlerdiń tozýynyń aldyn alý úshin tutas quqyqtyq negiz qalyptastyrý. Bul rette qujat jerdi alyp qoiý máselelerin rettemeidi, biraq olardyń sapasyn saqtaýǵa jáne odan ári nasharlaýyna jol bermeýge baǵyttalǵan birqatar talaptardy engizedi. Atap aitqanda, zań jobasy «topyraq» uǵymynyń ózin naqtylap, ony keńirek «jer» uǵymynan bólip kórsetedi», - delingen Májilis habarlamasynda.
Depýtattardyń aitýynsha, bul topyraqty qorǵaý men utymdy paidalaný boiynsha jeke sharalardy bekitýge múmkindik beredi.
«Osy saladaǵy memlekettik saiasatty iske asyrý boiynsha jergilikti atqarýshy organdardyń ókilettikteri, sonyń ishinde topyraqty qorǵaý jónindegi óńirlik is-sharalar josparlaryn ázirleý men oryndaý quzyreti aiqyndalady. Sonymen qatar, ǵylymi zertteýlerdiń basym baǵyttary belgilenedi, bul ǵylymi jumystardaǵy qazirgi bytyrańqylyq pen júiesizdikti joiýǵa tiis. Zań jobasy topyraq qasietterin qalpyna keltirý boiynsha mindetti sharalardy da engizedi. Onda topyraq qorǵaý tehnologiialaryn qoldaný, aýyspaly egisti engizý jáne ǵylymi negizdelgen júie boiynsha tyńaitqysh qoldaný qarastyrylǵan», - dep habarlady Májilis.
Qujatta qaýipti himiialyq zattardyń shamadan tys jinalýyna jol bermeý jáne topyraq jaǵdaiyna qarai keibir aýyl sharýashylyǵy daqyldaryn ósirýge shekteý qoiý da kózdelgen.
«Budan bólek, topyraqty sý basýdan, batpaqtanýdan, qaitalama tuzdanýdan, tozýdan, qurǵaýdan jáne tyǵyzdalýdan qorǵaý talaptary, sondai-aq tozǵan jerlerdi qalpyna keltirý sharalary bekitiledi. Bul talaptardy iske asyrý topyraqtyq jáne agrohimiialyq zertteýler málimetterine negizdeletin bolady. Sonymen qatar topyraq degradatsiiasynyń boljamdy modelderin jasaý, jerdi qashyqtan zondtaý derekterin jáne topyraq kúiin taldaý men kartaǵa túsirý úshin jasandy intellekt tehnologiialaryn paidalaný syndy qosymsha zamanaýi monitoring quraldaryn engizý kózdelgen», - delingen habarlamada.
Májiliste zań jobasymen jumys barysynda agrarilerge qatysty talaptardyń da kúsheitilgeni aityldy.
«Topyraqty qorǵaý týraly» zań jobasymen jumys barysynda depýtattar onyń negizgi erejelerin naqtylap, kúsheitti. Eń aldymen, ortalyq ýákiletti organ retinde Aýyl sharýashylyǵy ministrligi belgilenip, onyń negizgi ókilettikteri bekitilip otyr. Sonymen qatar, topyraqty jáne agrohimiialyq zertteýlerdi, topyraqty qorǵaý men onyń monitoringi boiynsha basqa da is-sharalardy júrgizý tetikteri reglamentteledi. Mundai jumystardyń nátijeleri men praktikalyq usynymdar kópshilikke qoljetimdi bolady jáne elektrondyq aýyl sharýashylyǵy kartasynda kórsetiledi», - dep habarlady Májilis.
Depýtattardyń málimetinshe, jer quqyq qatynastary sýbektileriniń quqyqtary men mindetteri de bólek bekitiledi.
«Sonyń ishinde topyraqtyń qunarly qabatyn qorǵaý boiynsha talaptar engiziledi. Atap aitqanda, jumys kezinde ony mindetti túrde sypyryp alý, durys saqtaý jáne keiinnen paidalaný, sondai-aq ony syrtqa shyǵarýǵa tyiym salý qarastyrylǵan. Ilespe zań jobasy qoldanystaǵy zańnamany jańa normalarmen úndestirýge baǵyttalǵan. Atap aitqanda, aýyl sharýashylyǵy jerlerin bergen kezde mindetti túrde aýyl sharýashylyǵy jeriniń pasportyn berý engiziledi», - delingen habarlamada.
Májilis málimetinshe, arnaiy pasportta jerdiń negizgi agrohimiialyq kórsetkishteri tirkeledi.
«Ol bonitet balyn, qarashirik mólsherin, azot, fosfor jáne kalii deńgeiin, tuzdaný dárejesin, qyshqyldyǵyn, mehanikalyq quramyn jáne topyraqtyń basqa da sipattamalaryn tirkeitin resmi qujatqa ainalady», - dep habarlady Májilis.
