Elimizde "Qorqyt Ata" jańa arnaiy ekonomikalyq aimaǵy (AEA) quryldy. Tiisti qaýlyǵa Premer-ministr Oljas Bektenov qol qoidy. Qujatqa sáikes, AEA Qyzylorda oblysynda "Batys Eýropa – Batys Qytai" halyqaralyq kólik dálizine jaqyn 550 gektar aýmaqta ornalasady, dep habarlaidy Dalanews.kz.
Arnaiy ekonomikalyq aimaq aýmaǵynda zamanaýi ónimdiligi joǵary, básekege qabiletti óndiristerdi jedel damytý, qyzmet kórsetýdiń sapaly jańa deńgeiin qalyptastyrý, investitsiia tartý, ekonomika salasynda jańa tehnologiialar engizý, sondai-aq halyqty jumyspen qamtýdy arttyrý úshin múmkindikter jasaý josparlanýda. AEA-nyń "Batys Eýropa – Batys Qytai" halyqaralyq kólik dálizine jaqyndyǵy Qazaqstan men Ortalyq Aziia naryqtarynda ónimdi tiimdi ótkizýge múmkindik beredi.
AEA aýmaǵynda salyqtyq jáne kedendik jeńildikter usyna otyryp, arnaiy quqyqtyq rejim áreket etetin bolady.
2049 jylǵa qarai AEA-ǵa salynatyn investitsiianyń jalpy kólemin 150 mlrd teńgege, sheteldik salymdardy – 80 mlrd teńgege deiin jetkizý josparlanyp otyr. Taýarlar óndirý men qyzmet kórsetý kólemi 500 mlrd teńge deńgeiinde boljanýda. Qazaqstandyq qamtý úlesi – 90%-ǵa deiin jetedi.
25 jyl ishinde AEA kásiporyndarynda 3 366 jańa jumys ornyn ashý kózdelgen, qatysýshy kompaniialardyń sany 39-ǵa jetkiziledi.
Sondai-aq mýltimodaldy áýe habtaryn qurý jónindegi is-sharalardy iske asyrý sheńberinde jáne keden zańnamasynyń talaptaryna sáikes, atalǵan qaýlymen "Ońtústik", "Astana – Tehnopolis", "Saryarqa", "Alatau" jáne "Aqtóbe" AEA-ǵa port aimaqtary mártebesi berildi.
