Qazaqstanda sýdaǵy qaiǵyly oqiǵalar jyl saiyn qaitalanyp keledi,dep habarlaidy Dalanews.kz.
Sońǵy úsh jylda elde 688 adam sýǵa batyp kóz jumǵan, onyń 151-i balalar. Tek 2025 jylǵy shomylý maýsymynyń alǵashqy eki aiynda 62 adam qaza boldy, olardyń 24-i kámeletke tolmaǵandar.
Osy statistikadan keiin elde júzýdi júieli túrde oqytý máselesi kún tártibine shyqty. Qazaq Expert Club sarapshysy Evgenii Azarevtiń aitýynsha, 2026 jyldan bastap Almaty men Astanada Swim Nation atty pilottyq joba iske qosylady. Baǵdarlamany Qazaq Aquatics ázirlegen.
Joba aiasynda ár qalada 1000 oqýshy qamtylady. Ár bala jylyna shamamen 33–34 ret júzý sabaǵyna qatysady, iaǵni aptasyna bir ret. Bir qalaǵa arnalǵan jobanyń boljamdy quny 45 mln teńge. Qatysý erikti, mektep ózi sheshim qabyldaidy. Eger nátije tiimdi bolsa, baǵdarlama búkil elge taratylady.
Halyqaralyq tájiribe kórsetkendei, mektepte júzýdi engizý balalar arasyndaǵy sýdaǵy ólimdi 20–30% azaita alady. Alaida Qazaqstandaǵy basty kedergi infraqurylym bolyp otyr.
Almatydaǵy qoldanystaǵy basseinderdiń jalpy aýmaǵy 17,6 myń sharshy metr ǵana. Qajettilik 39,2 myń sharshy metrden asady. Bul megapolistiń ózinde basseinder normativten úsh ese az ekenin bildiredi. Aimaqtarda jaǵdai odan da kúrdeli. Kóptegen shaǵyn qalalarda bassein joq, al bar nysandar kúrdeli jóndeýdi qajet etedi. Orta eseppen Qazaqstanda 1 mln adamǵa 25 basseinnen keledi. Bul Eýropa elderinen birneshe ese tómen.
Taǵy bir túiin qarjylandyrýǵa tireledi. Kóptegen jas sportshylar jarysqa barý, qural-jabdyq pen oqý-jattyǵý jiyndarynyń shyǵynyn ózderi kóteredi. 2025 jyldan bastap sý sportyn damytýǵa jaýapty federatsiia demeýshilerdi tartý arqyly bul júktemeni azaitýdy kózdep otyr.
Júzý Qazaqstan úshin tek sport emes. Bul balalardyń ómirin saqtaýdyń naqty joly. Swim Nation jobasy sýdaǵy ólimdi azaitýǵa jasalǵan alǵashqy júieli qadam bolmaq.
