Zertteu Research Institute Sholpan Aitenova direktory qazaqstandyq sportqa 26 jyldan beri bólingen aqshany sanap shyqty, - dep habarlaidy Dalanews.kz.
Aitenovanyń sózinshe, 1998 jyldan beri sportqa bólinetin qarjy 10 ese kóbeigen.
«Alaida, bul eldiń olimpiadalyq sport túrlerindegi kórsetkishteriniń aitarlyqtai jaqsarýyna áser etken joq. Mysaly 1996 jyly memlekettik biýdjet 280 milliard teńge bolǵan kezde Qazaqstan 11 medal aldy, onyń úsheýi altyn. Al eń tabystysy London (2012) jáne Rio (2016) olimpiadasy sanalady. Ol jyly sportshylarymyz 15 jáne 17 medal aldy. Biraq keiinnen doping daýy bolyp, keibir sportyshalyrymyz medalinen aiyrylyp, al medaldiń kóbin shetelden kelgen sportshylar aldy. Iaǵni olimpiadalyq oiyndarda nátije azdap qana bolǵan, onyń ózi shetelden kelgen sportshylardyń arqasynda jetken jetistigimiz», - deidi Aitenova.
Sarapshy munyń sebebin túsindirdi.
«Bul keiingi 26 jylda memlekettik sport saiasatynda buqaralyq jáne olimpiadalyq sportty damytýdyń naqty strategiiasy bolmaǵan degen sóz. Al bul sportqa qarjyny az quidyq degen sóz be? Joq. Densaýlyq saqtaý salasynda densaýlyq saqtaýdyń barlyq shyǵyndaryn úsh jerden qarastyratyn ulttyq shottar júiesi bar: biýdjet, saqtandyrý kompaniialary jáne úi sharýashylyqtarynyń qaltasynan. Sportta da sondai: investitsiia ártúrli jerden túsedi. Mysaly qazaqstandyqtar buqaralyq jáne balalar sportyn óz qarjysy esebinen qarjylandyrady, jergilikti biýdjet kásibi fýtbol klýbtaryn qoldaidy, al Samuryq-Qazyna kásibi fýtbol, hokkei klýbtaryn, veloklýbty, minifýtbol klýbtaryn qarjylandyrady. Ótemuratov jáne Boranbaev sekildi jeke investorlar da bar. Nege bulai? Sebebi naqty ustanym joq. Kásibi fýtbol klýbtaryn biýdjet esebinen qarjylandyrýdyń ornyna buqaralyq sportty qoldaý úshin sport infraqurylymyn damytý kerek edi. Bul bárine belgili nárse. Mysaly osy aptada «Ordabasy» Armeniianyń Piýnik fýtbol klýbymen oinady. Biýdjet arqyly qarjylandyrylatyn shymkenttik komandanyń oiyny Almatyda ótti, sebebi Shymkenttegi ortalyq stadion ÝEFA talaptaryna sai kelmeidi. Fýtbolǵa qyrýar qarjy bólingenimen komanda oinaityn jer jaramsyz bolyp qalady. Jalpy elde ÝEFA talaptaryna sai keletin eki stadion ǵana bar, onyń ekeýi de Astana men Almatyda», - deidi Sholpan Aitenova.
Onyń sózinshe, ózge de sport túrlerindegi jaǵdai osy.
«Qazaqstanda kórkem gimnastikaǵa arnalǵan, halyqaralyq standarttarǵa sai keletin eki-aq zal bar (Astana men Shymkentte). Balalarǵa arnalǵan sport túrlerine ata-analar ózi aqsha bólip úiretedi, al infraqurylymdy damytýǵa olardyń aqshasy jetpeidi. Sondyqtan olimpiadadaǵy sport túrlerinen nátije shyǵara almai júrmiz, sebebi qarjylandyrý uzaq merzimdi strategiialarmen bailanysty emes jáne nátijege baǵyttalmaǵan», - deidi maman.
Aitenova Sportty qoldaý qory 2020-2024 jyldar aralyǵynda olimpiadalyq sport túrlerin qoldaýǵa 10 milliard teńge bólgenin aitady.
