Zertteu Research Institute شولپان ايتەنوۆا ديرەكتورى قازاقستاندىق سپورتقا 26 جىلدان بەرى بولىنگەن اقشانى ساناپ شىقتى، - دەپ حابارلايدى Dalanews.kz.
ايتەنوۆانىڭ سوزىنشە، 1998 جىلدان بەرى سپورتقا بولىنەتىن قارجى 10 ەسە كوبەيگەن.
«الايدا، بۇل ەلدىڭ وليمپيادالىق سپورت تۇرلەرىندەگى كورسەتكىشتەرىنىڭ ايتارلىقتاي جاقسارۋىنا اسەر ەتكەن جوق. مىسالى 1996 جىلى مەملەكەتتىك بيۋدجەت 280 ميلليارد تەڭگە بولعان كەزدە قازاقستان 11 مەدال الدى، ونىڭ ۇشەۋى التىن. ال ەڭ تابىستىسى لوندون (2012) جانە ريو (2016) وليمپياداسى سانالادى. ول جىلى سپورتشىلارىمىز 15 جانە 17 مەدال الدى. ءبىراق كەيىننەن دوپينگ داۋى بولىپ، كەيبىر سپورتىشالىرىمىز مەدالىنەن ايىرىلىپ، ال مەدالدىڭ كوبىن شەتەلدەن كەلگەن سپورتشىلار الدى. ياعني وليمپيادالىق ويىنداردا ناتيجە ازداپ قانا بولعان، ونىڭ ءوزى شەتەلدەن كەلگەن سپورتشىلاردىڭ ارقاسىندا جەتكەن جەتىستىگىمىز»، - دەيدى ايتەنوۆا.
ساراپشى مۇنىڭ سەبەبىن ءتۇسىندىردى.
«بۇل كەيىنگى 26 جىلدا مەملەكەتتىك سپورت ساياساتىندا بۇقارالىق جانە وليمپيادالىق سپورتتى دامىتۋدىڭ ناقتى ستراتەگياسى بولماعان دەگەن ءسوز. ال بۇل سپورتقا قارجىنى از قۇيدىق دەگەن ءسوز بە؟ جوق. دەنساۋلىق ساقتاۋ سالاسىندا دەنساۋلىق ساقتاۋدىڭ بارلىق شىعىندارىن ءۇش جەردەن قاراستىراتىن ۇلتتىق شوتتار جۇيەسى بار: بيۋدجەت، ساقتاندىرۋ كومپانيالارى جانە ءۇي شارۋاشىلىقتارىنىڭ قالتاسىنان. سپورتتا دا سونداي: ينۆەستيسيا ءارتۇرلى جەردەن تۇسەدى. مىسالى قازاقستاندىقتار بۇقارالىق جانە بالالار سپورتىن ءوز قارجىسى ەسەبىنەن قارجىلاندىرادى، جەرگىلىكتى بيۋدجەت كاسىبي فۋتبول كلۋبتارىن قولدايدى، ال سامۇرىق-قازىنا كاسىبي فۋتبول، حوككەي كلۋبتارىن، ۆەلوكلۋبتى، مينيفۋتبول كلۋبتارىن قارجىلاندىرادى. وتەمۇراتوۆ جانە بورانبايەۆ سەكىلدى جەكە ينۆەستورلار دا بار. نەگە بۇلاي؟ سەبەبى ناقتى ۇستانىم جوق. كاسىبي فۋتبول كلۋبتارىن بيۋدجەت ەسەبىنەن قارجىلاندىرۋدىڭ ورنىنا بۇقارالىق سپورتتى قولداۋ ءۇشىن سپورت ينفراقۇرىلىمىن دامىتۋ كەرەك ەدى. بۇل بارىنە بەلگىلى نارسە. مىسالى وسى اپتادا «ورداباسى» ارمەنيانىڭ پيۋنيك فۋتبول كلۋبىمەن وينادى. بيۋدجەت ارقىلى قارجىلاندىرىلاتىن شىمكەنتتىك كوماندانىڭ ويىنى الماتىدا ءوتتى، سەبەبى شىمكەنتتەگى ورتالىق ستاديون ۋەفا تالاپتارىنا ساي كەلمەيدى. فۋتبولعا قىرۋار قارجى بولىنگەنىمەن كوماندا وينايتىن جەر جارامسىز بولىپ قالادى. جالپى ەلدە ۋەفا تالاپتارىنا ساي كەلەتىن ەكى ستاديون عانا بار، ونىڭ ەكەۋى دە استانا مەن الماتىدا»، - دەيدى شولپان ايتەنوۆا.
ونىڭ سوزىنشە، وزگە دە سپورت تۇرلەرىندەگى جاعداي وسى.
«قازاقستاندا كوركەم گيمناستيكاعا ارنالعان، حالىقارالىق ستاندارتتارعا ساي كەلەتىن ەكى-اق زال بار (استانا مەن شىمكەنتتە). بالالارعا ارنالعان سپورت تۇرلەرىنە اتا-انالار ءوزى اقشا ءبولىپ ۇيرەتەدى، ال ينفراقۇرىلىمدى دامىتۋعا ولاردىڭ اقشاسى جەتپەيدى. سوندىقتان وليمپياداداعى سپورت تۇرلەرىنەن ناتيجە شىعارا الماي ءجۇرمىز، سەبەبى قارجىلاندىرۋ ۇزاق مەرزىمدى ستراتەگيالارمەن بايلانىستى ەمەس جانە ناتيجەگە باعىتتالماعان»، - دەيدى مامان.
ايتەنوۆا سپورتتى قولداۋ قورى 2020-2024 جىلدار ارالىعىندا وليمپيادالىق سپورت تۇرلەرىن قولداۋعا 10 ميلليارد تەڭگە بولگەنىن ايتادى.
