Qazaqstannyń birqatar óńirinde shetel azamattaryna ǵana arnalǵan oiyn aimaqtaryn qurý múmkindigi zertteldi, dep habarlaidy Dalanews.kz.
Týrizm jáne sport ministrliginiń málimeti boiynsha zertteý týristik salany damytý jáne sheteldik aǵyndy arttyrý maqsatynda júrgizilgen. Áńgime Qazaqstan azamattaryna kirýge shekteý qoiylatyn, tek sheteldik týristerge baǵyttalǵan kazino aimaqtary týraly bolyp otyr. Ministrlik dereginshe, halyqaralyq tájiribe mundai modeldiń kýrorttyq infraqurylymdy damytýǵa yqpal etip, ishki áleýmettik ortaǵa tikelei áser etpeitinin kórsetedi.
Zertteý qorytyndysyna sáikes, Mańǵystaý oblysynda turǵyndardyń 46 paiyzy sheteldikterge arnalǵan kazino ashýdy qoldaǵan. Boljam boiynsha, 2029 jylǵa qarai óńirge shamamen 148 myń sheteldik týrist kelip, 7 myńǵa jýyq turaqty jumys orny ashylyp, biýdjetke 1,2 mlrd teńge salyq túsýi múmkin.
Jetisý oblysynda saýalnamaǵa qatysqandardyń 67 paiyzy mundai bastamaǵa qarsy emes. Esepteýlerge sáikes, óńir jyl saiyn 36 myńǵa deiin sheteldik týrist qabyldap, shamamen 700 jumys orny qurylyp, biýdjetke 2,4 mlrd teńge salyq túsýi yqtimal.
Al Almaty oblysynda respondentterdiń 54,5 paiyzy Qazaqstan azamattary úshin shekteýi bar oiyn aimaqtaryn qurýdy qoldaǵan. Ekonomikalyq taldaý derekterine súiensek, 2030 jylǵa qarai óńirge keletin sheteldik týrister sany 22 810 adamǵa jetip, 2028 jylǵa deiin eki oiyn aimaǵy 6,5 mlrd teńge salyq túsimin jáne 2 myń turaqty jumys ornyn qamtamasyz etýi múmkin.
Ministrlik málimetinshe, oiyn aimaqtaryn qurý jáne olardyń qyzmeti Qazaqstan Respýblikasynyń «Oiyn biznesi týraly» zańyna qatań sáikes júzege asyrylady. Aimaqtardyń naqty shekarasyn jergilikti atqarýshy organdar aiqyndaidy, al jumys tártibi tek shetel azamattaryn qabyldaýdy kózdeidi.
