Qazaqstanda shaǵyn jáne orta bizneske arnalǵan jańa memlekettik «Isker aimaq» baǵdarlamasynyń parametrleri tanystyryldy, dep habarlaidy Dalanews.kz.
«5 jeltoqsanda «Altyn sapa» jáne «Paryz» syilyqtarynyń laýreattaryn marapattaý rásiminde Memleket basshysy úkimetke jańa Salyq kodeksiniń keibir normalary boiynsha kásipkerlerdiń ótinishterin taldap, teńdestirilgen sheshim qabyldaýdy tapsyrdy. Bul – jalpyulttyq mańyzy bar mindet retinde qaraldy. Osy tapsyrmaǵa jaýap retinde «Isker aimaq» atty Birikken shaǵyn bizneske qoldaý kórsetý baǵdarlamasy ázirlendi. Baǵdarlama «Amanat» partiiasy jáne «Atameken» Ulttyq kásipkerler palatasymen birlese ázirlendi», – dedi Úkimet otyrysynda Premer-Ministrdiń orynbasary – Ulttyq ekonomika ministri Serik Jumanǵarin.
Ministrdiń aitýynsha, baǵdarlama shaǵyn kásipkerlikti, ásirese aýyldy eldi mekender men kishi qalalardy damytýǵa baǵyttalǵan.
«Baǵdarlama qarapaiym, jyldam iske asyrylatyn jobalarǵa basymdyq beredi jáne áleýmettik-ekonomikalyq tiimdilikti tez qamtamasyz etedi. Programma aiasynda aýyl sharýashylyǵy shikizatyn óńdeý, teri óńdeý, mini-toqash fabrikalary, sút jáne et ónimderiniń jartylai fabrikattary, tamaq óndirisi, aǵash óńdeý, jihaz tsehtary, qurylys materialdaryn óndirý, qolóner jáne basqa da jergilikti qosylǵan qun tizbekterin qalyptastyratyn baǵyttar qoldaý alady», – dep túsindirdi Serik Jumanǵarin.
Baǵdarlamanyń negizgi tásili – óńirlerdi kásipkerlikti damytýǵa qosymsha jaýapkershilikke tartý, iaǵni jergilikti atqarýshy organdar óńirlik áleýet pen qajettilikterdi eskere otyryp, basym salalardyń qosymsha tizimin qalyptastyrady.
Baǵdarlama eki deńgeili sýbsidiia júiesin qarastyrady. Birinshi deńgei – Abai, Ulytaý, Jetisý, Soltústik Qazaqstan jáne Qyzylorda oblystaryna biýdjet sýbsidiialarynyń 30%-yna deiin bólinýi. Ekinshi deńgei – qalǵan óńirlerge 70%-ǵa deiin bólinýi. Qarjylandyrýǵa qoljetimdilik sýbsidiialaý jáne kepildik mehanizmderiniń úilesimi arqyly qamtamasyz etiledi. Munda «Damý» qory negizgi qaryzdyń 80%-yna deiin kepildik berýge daiyn.
Baǵdarlama úsh ózara bailanysty baǵytta iske asyrylady:
- Qarjylyq qoldaý – nesiege paiyzdyq stavka boiynsha sýbsidiialar, kepildik berý arqyly shaǵyn bizneske nesie alý qunyn tómendetý.
- Qarjylyq emes qoldaý – salalyq onlain oqytý, servistik jáne konsýltatsiialyq qoldaý arqyly kásipkerlerdiń biliktiligin arttyrý.
- Infraqurylymdyq qoldaý – óndiristik jáne kommýnaldyq infraqurylymǵa qoljetimdilik, jeńildetilgen jalǵa alý, jer ýchaskelerin berý.
Jumanǵarin atap ótkendei, qazirgi ýaqytta «Aýyl amanaty», «Bir aýyl – bir ónim» siiaqty baǵdarlamalar iske asyrylyp keledi. Osy baǵdarlamalar aiasynda júzege asyrylatyn jobalar, sonyń ishinde aýyl sharýashylyǵy kooperativteri, «Isker aimaq» baǵdarlamasy aiasynda qosymsha qoldaý alady jáne sýbsidiia, infraqurylymdyq jáne qarjylyq emes memlekettik qoldaý úshin birinshi kezekte qaralady.
Baǵdarlamanyń jalpy nesie kólemi jylyna shamamen 400 mlrd teńgeni quraidy. 2026 jyly sýbsidiialarǵa qajetti qarajat – 24 mlrd teńge, al birinshi jyly 5 myńnan astam joba qoldaý alady. Baǵdarlamaǵa mikro- jáne shaǵyn kásipkerlik sýbektileri qatysa alady. Bir jobaǵa maksimaldy nesie kólemi – 200 mln teńge. Sýbsidiia – nominaldy mólsherlemeniń 40%-y, merzimi – 3 jylǵa deiin, uzartýsyz.
Ministrdiń málimetinshe, baǵdarlama 2026–2028 jyldary iske asyrylsa:
- shamamen 23 myń jobany qoldaidy;
- 1,2 trln teńge kóleminde nesie beriledi;
- biýdjet qoldaýy – 127 mlrd teńge.
Kútiletin mýltiplikativtik áseri:
- salyq túsimderi – 157 mlrd teńge;
- ónim shyǵarylymy – 1,4 trln teńge;
- 7 myń jańa jumys orny qurylyp, 136 myń jumys orny saqtalady.
Baǵdarlama tsifrlyq sheshimder arqyly basqarylatyn bolady: egov.business jáne Damu Online portaldary arqyly ótinim berý, «bir tereze» qaǵidaty, jobalardy naqty ýaqyt rejiminde monitoringteý. Internet joq shalǵai aýyldar úshin mobildi keńseler (avtobýstar) arqyly keńes berý jáne memlekettik qoldaý sharalaryn túsindirý uiymdastyrylady.
