Qazaqstanda azamattyq qorǵaý salasyndaǵy keibir qyzmetkerlerge turǵyn úi tólemderi beriledi. Bul týraly aqparatty Tótenshe jaǵdailar ministrliginiń baspasóz qyzmeti málimdedi, dep habarlaidy Dalanews.kz.
Jazda prezident qutqarýshylardyń mártebesin arttyrýǵa baǵyttalǵan zańnamaǵa túzetýlerge qol qoiǵan edi. Onda turǵyn úi tólemderi men kóterme járdemaqylar berý qarastyrylǵan.
"Bul sheshim kún saiyn eldiń qaýipsizdigin qorǵap, azamattyq qorǵaýdyń mańyzdy mindetterin atqaryp júrgen TJM qyzmetkerleriniń áleýmettik qorǵalýyn kúsheitý jolyndaǵy tarihi qadam boldy. Osy ýaqyttan bastap TJM qyzmetkerleri turǵyn úi tólemderin alýda áskeri qyzmetshilermen teń quqyqqa ie. Búginde ministrlik qyzmetkerlerdiń turǵyn úige muqtaj ekenin anyqtap, tiisti tólemderdi taǵaiyndaý boiynsha júieli jumys júrgizýde", – dep atap ótti vedomstvo.
Alaida ministrlik tólem kólemin naqtylaǵan joq. Aita keteiik, áskeri qyzmetshiler úshin turǵyn úi tólemderiniń mólsheri ipotekalyq qaryzǵa nemese qyzmet ótkeretin óńirdegi 1 sharshy metr baspana qunyna bailanysty esepteledi.
Eske salaiyq, buǵan deiin premer-ministrdiń orynbasary – ulttyq ekonomika ministri Serik Jumanǵarin áleýmettik qoldaýǵa ie bolatyn azamattar sanatyn bekitken buiryqqa qol qoiǵan edi.
- arnaiy jáne memlekettik áleýmettik járdemaqy alýshylar;
- zeinetaqy tólemderin alyp otyrǵan múmkindigi shekteýli jandar;
- ata-anasynyń qamqorlyǵynsyz qalǵan balalar men jetimder;
- ataýly áleýmettik kómek (AÁK) alýshylar;
- áleýmettik mańyzy bar aýrýlary bar adamdar;
- ainalasyndaǵylar úshin qaýipti aýrýǵa shaldyqqandar;
- uzaq ýaqyt eńbekke jaramsyz (eki aidan astam) azamattar;
- sozylmaly syrqattyń aýyr túrimen aýyratyndar.
