Qazaqstanda 2025 jylǵy qańtar–qazan ailarynda oryndalǵan qurylys jumystarynyń kólemi 15,1%-ǵa ósip, 7 263,2 mlrd teńgeni qurady. Bul týraly Ulttyq statistika biýrosy málimdedi, dep habarlaidy Dalanews.kz.
Vedomstvonyń dereginshe, qurylys ósimine ǵimarattar men imarattar salý qarqynynyń artýy áser etken. Imarattar qurylysy 19,2%-ǵa, turǵyn emes ǵimarattar 10,2%-ǵa, al turǵyn úilerdi salý 7,6%-ǵa ulǵaiǵan.
Qurylys jumystarynyń qurylymynda eń úlken úles avtomobil, temirjol jáne metro nysandaryna tiesili — 24,9%. Odan keiin turǵyn emes ǵimarattar qurylysy (21,6%) jáne turǵyn úiler (12,6%) ornalasqan.
Respýblika boiynsha jumystardyń 92,9%-yn jeke qurylys uiymdary oryndaǵan. Sheteldik kompaniialardyń úlesi – 6,6%, memlekettik uiymdar – 0,5%.
Eldiń 18 óńirinde qurylys kólemi artqan. Eń joǵarǵy ósim Astana (39,4%) men Almaty qalalarynda (35,4%) tirkeldi. Soltústik Qazaqstan (30,1%), Túrkistan (28,6%), Qostanai (27,5%), Pavlodar (22,6%), Aqmola (21,7%) jáne Almaty oblystarynda da aitarlyqtai ulǵaiý baiqaldy.
2025 jyldyń alǵashqy on aiynda paidalanýǵa berilgen jańa obektilerdiń jalpy aýdany 19,7 mln sharshy metrdi qurady. Turǵyn úiler kólemi ótken jyldyń sáikes kezeńimen salystyrǵanda 4,5% ósip, 14,6 mln sharshy metrge jetti. Onyń 9,3 mln sharshy metri – kóp páterli úiler, 5,2 mln sharshy metri – jeke turǵyn úiler.
Paidalanýǵa berilgen turǵyn úilerdiń 92%-yn jeke qurylys salýshylar qamtamasyz etti. Sonymen qatar halyq óz kúshimen 5,5 mln sharshy metr baspana salǵan.
