Qazaqstanda jumys berýshiler eń kóp izdeıtin mamandar satý jáne klıentterge qyzmet kórsetý baǵytynda tirkeldi. HeadHunter.kz platformasynyń deregine sáıkes, shilde-qyrkúıek aılary aralyǵynda elimizde 145 myńnan astam belsendi vakansıa jarıalanǵan, dep habarlaıdy Dalanews.kz.

Belsendiliktiń azdap tómendeýine qaramastan, el boıynsha usynystar kólemi joǵary deńgeıde saqtalyp otyr. Eń kóp bos jumys orny dástúrli túrde Almaty qalasyna tıesili — 40,1%, biraq bul byltyrǵymen salystyrǵanda 3,8%-ǵa az. Ekinshi orynda — Astana (22,1%), munda kerisinshe ósim baıqalǵan (+2,3%). Úshinshi orynda Qaraǵandy qalasy (5,2%), munda jumys berýshilerdiń belsendiligi azdap tómendegen (-1,6%).

Bul úsh qala eldegi negizgi iskerlik ortalyqtar bolyp qalyp otyr. Degenmen birqatar óńirde oń ózgeris baıqalady:

• Shymkent – 4,7% (+4,1%);

• Qostanaı – 3,2% (+5,4%);

• Petropavl – 1,5% (+7,7%);

• Kókshetaý – 1,4% (+11,3%);

• Taraz – 1,1% (+3,4%).

Al kerisinshe, keıbir qalalarda jumys usynystary azaıǵan:

Aqtóbe (-10,6%), Atyraý (-8,1%), Aqtaý (-8,5%) jáne Oral (-7,5%).

Sarapshylar bul qubylysty maýsymdyq jumystardyń aıaqtalýymen jáne munaı-gaz, qurylys sıaqty resýrstyq salalardaǵy belsendiliktiń tómendeýimen baılanystyrady.

Eń suranysqa ıe salalar:

• Satý jáne klıentterge qyzmet kórsetý – jalpy vakansıanyń 12,2%-yn qurady. Bul baǵyt kósh basynda turǵanymen, ótken jylmen salystyrǵanda 5,4%-ǵa tómendegen.

• Marketıń, jarnama jáne PR – 7,8% (-0,4%);

• Jumysshy kadrlar – 7,7% (+1,6%).

Turaqty ósim baıqalǵan salalar:

• Óndiris pen servıs – 5,3% (+5,9%);

• Qurylys jáne jyljymaıtyn múlik – 5,6% (+2,8%);

• Týrızm, qonaqúıler jáne meıramhana bıznesi – 4,8% (+4,2%);

• Qarjy jáne býhgalterıa – 4,8% (+2,5%).

Aıryqsha ósim aqparattyq tehnologıalar salasynda baıqaldy — 9%. Sarapshylar muny el ekonomıkasynyń sıfrlanýy men bıznes-prosesterdiń jańǵyrýymen baılanystyrady.

Belsendiligi tómendegen baǵyttar:

• Ákimshilik qyzmetkerler – mınýs 9,1%;

• Kólik jáne avtoqyzmet kórsetý – mınýs 4,6%;

• Sport jáne fıtnes – mınýs 3,8%;

• Úı qyzmeti jáne jeke kómekshiler – mınýs 2,3%.

Soǵan qaramastan, bul salalar áli de eńbek naryǵynda óz ornyn saqtap, jumys berýshiler arasynda suranysqa ıe bolyp otyr.

Qorytyndylaı kele, sarapshylar III toqsannyń nátıjesi boıynsha Qazaqstan eńbek naryǵynyń turaqty ekenin atap ótti.

“Jappaı mamandyqtar áli de basym, alaıda IT, menejment, saqtandyrý jáne shıkizat óndirý salalary jańa jumys oryndarynyń negizgi ósim núktesine aınalyp keledi”, — delingen taldaý qorytyndysynda.