Soltústik Qazaqstan oblysyna jyl basynan beri 129 qandas kóship kelgen. Kóbi kórshiles Resei, Qytai, Mońǵoliia men Ózbekstannan qonys aýdarǵan, dep habarlaidy dalanews.kz 24.kz-ke siltep.
Aibarshyn Qudaibergenova 2 jyl buryn Ózbekstannan atajurtqa oralǵan. Qazir Qyzyljar aýdanynyń Beskól aýylynda turady. Otbasyn qoldaý ortalyǵynda psiholog bolyp jumys isteidi. Onyń aitýynsha, qandastar kómek surap, jii keledi. Sebebi qonys aýdarý kezindegi qiyndyqtardy basynan ótkeredi. Otanyna oralǵandarǵa memleket tarapynan arnaiy sýbsidiia berilgen. Úi satyp alý úshin 7 mln teńge bólingen.
Aita keteiik, endi "qandas" mártebesin alý úshin arnaiy test tapsyrý erejesi engizildi. Osylaisha, úmitkerlerdiń memlekettik tildi bilý deńgeii anyqtalady. Mamandardyń aitýynsha, tildi tereń bilý talap etilmese de, kúndelikti qarym-qatynas jasai alǵany jón.
"QAZTEST eki bloktan turady: tyńdalym jáne aýdio. Ár blok boiynsha keminde 70 paiyz durys jaýap berý qajet. Tiisti baldy jinaǵan jaǵdaida ekinshi kezeńge, iaǵni anketa toltyrýǵa óte alady. Anketada úmitker óziniń jeke málimetin engizedi: eńbek ótili, mamandyǵy jáne jaqyn týystary týraly aqparat bolǵan jaǵdaida barlyǵyn tolyq kórsetedi. Osy kezeńderdiń barlyq upaiyn qosqanda kem degende 600 upai jinaý qajet. Sodan keiin memlekettik organdardyń qaraýynan ótip, suhbattasady. Osylaisha, synaqtardan súrinbei ótken azamattarǵa qandas mártebesi beriledi", - dedi Jumyspen qamtýdy úilestirý jáne áleýmettik baǵdarlamalar basqarmasynyń bas mamany Nazerke Tasqulova.
Alǵashqy árekette qajet upai jinai almaǵan qatysýshylar synaqty qaita tapsyra alady. Ereje boiynsha aldyńǵy synaqtan keiingi 30 kún ishinde qosymsha eki múmkindik beriledi. Ár talpynys úshin aqy bólek tólenedi.
