Qazaqstanda barlyq meditsinalyq qyzmetti qosylǵan qun salyǵynan bosatý máselesi kóterildi. Al dári-dármek pen meditsinalyq buiymdarǵa biryńǵai 5 paiyzdyq QQS mólsherlemesin engizý usynyldy, dep habarlaidy dalanews.kz.
Bastamany "Atameken" Ulttyq kásipkerler palatasy jańa Salyq kodeksin engizý jónindegi jobalyq keńseniń otyrysynda usyndy. Palata ókilderi densaýlyq saqtaý salasynda birneshe túrli salyq mólsherlemesiniń qatar qoldanylýy esep júrgizý men ákimshilendirýdi qiyndatatynyn alǵa tartqan.
Ázirge bul másele boiynsha naqty sheshim qabyldanǵan joq. Usynystyń biýdjetke, meditsina salasyna, dári-dármek pen meditsinalyq kómektiń qoljetimdiligine yqpaly qosymsha saralanady.
Qazir TMKKK jáne MÁMS aiasynda kórsetiletin meditsinalyq qyzmetter men beriletin 3 myńnan astam dári-dármek QQS-tan bosatylǵan. Mundai jeńildik sirek kezdesetin jáne áleýmettik máni bar aýrýlardy diagnostikalaý, emdeý, aldyn alý jáne ońaltý qyzmetterine de qoldanylady.
Al dári-dármek pen meditsinalyq buiymdardy kóterme jáne bólshek saýdada satýǵa 2026 jyldan bastap 5 paiyzdyq QQS belgilengen. Qoldanystaǵy tártip boiynsha bul mólsherleme 2027 jylǵy 1 qańtardan bastap 10 paiyzǵa deiin ósedi.
Endi "Atameken" osy taýarlarǵa 5 paiyzdyq biryńǵai mólsherlemeni saqtap, meditsinalyq qyzmetterdi QQS-tan tolyǵymen bosatýdy usynyp otyr.
