Qazaqstanda tsifrlyq aktivter naryǵyn zańdastyrý jáne onyń ashyqtyǵyn arttyrý maqsatynda jańa salyqtyq jeńildikter qarastyrylyp jatyr. Tiisti usynystar jańa Salyq kodeksiniń jobasyna engizilgen kezekti túzetýler paketinde qamtylǵan, dep habarlaidy dalanews.kz.
Qazaqstan Respýblikasy Ulttyq ekonomika ministrliginiń málimetinshe, azamattardy tsifrlyq aktivtermen zańdy túrde operatsiia jasaýǵa yntalandyrý kózdelip otyr. Usynys qabyldanǵan jaǵdaida Qazaqstanda tirkelgen tsifrlyq aktivter qyzmetin kórsetýshi provaiderler arqyly mámile jasaǵan jeke tulǵalar osy operatsiialardan alǵan tabysy úshin jeke tabys salyǵyn tóleýden bosatylýy múmkin.
"Jeke tulǵalardy tsifrlyq aktivterdiń zańdy ainalymyna tartý úshin jeńildetilgen salyq sharttaryn engizý usynylyp otyr. Qazaqstandyq tsifrlyq aktivter provaiderleri arqyly jasalǵan operatsiialardan alynǵan tabysty jeke tabys salyǵynan bosatý qarastyrylǵan", – dep habarlady ministrlik.
Jospar boiynsha bul jeńildik 2026 jylǵy 1 qańtardan 2028 jylǵy 31 jeltoqsanǵa deiin qoldanylady.
Bastamanyń negizgi maqsaty – kriptovaliýta men ózge de tsifrlyq aktivterge qatysty operatsiialardy kóleńkeli ainalymnan shyǵaryp, azamattardy Qazaqstan aýmaǵynda zańdy jumys isteitin platformalardy paidalanýǵa yntalandyrý. Sonymen qatar bul shara eldegi tsifrlyq aktivter naryǵyn damytýǵa jáne memleket baqylaýyndaǵy ashyq ekojúie qalyptastyrýǵa baǵyttalǵan.
Atalǵan usynys jańa Salyq kodeksin engizý jónindegi jobalyq keńseniń 21-otyrysynyń qorytyndysy boiynsha ázirlengen. Qazirgi ýaqytta túzetýler talqylaý satysynda jáne zań jobasy qaralǵanǵa deiin biznes ókilderimen qosymsha pysyqtalmaq.
