Qazaqstan Respýblikasy Mádeniet jáne aqparat ministrliginiń qoldaýymen Kreativti indýstriialardy damytý qory QazaqCreative biryńǵai tsifrlyq platformasyn iske qosty. Jańa tsifrlyq platforma kreatorlarǵa memlekettik qoldaý tetikterin bir júie arqyly paidalanýǵa múmkindik beredi, dep habarlaidy dalanews.kz.
Qordyń habarlaýynsha, platforma jeke jáne zańdy tulǵalarǵa arnalǵan. Olardyń qatarynda avtorlar, dizainerler, sýretshiler, fotograftar, mýzykanttar, qolónershiler, sondai-aq shyǵarmashylyq stýdiialar, agenttikter, prodiýserlik ortalyqtar jáne kreativti indýstriia salasynda jumys isteitin ózge de uiymdar bar.
Endi kreatorlar www.qazaqculture.com portalyndaǵy QazaqCreative bólimi arqyly tirkelip, jeke kabinetin ashyp, platformadaǵy tsifrlyq servisterdi paidalana alady.
"Tirkelgen paidalanýshylar óz profilin basqaryp, jobalary men qyzmetteri týraly aqparat jariialai alady. Sondai-aq memlekettik qoldaý baǵdarlamalaryna qatysýǵa ótinim berip, habarlamalar alyp otyrady", – delingen habarlamada.
Qordyń málimetinshe, platformada granttyq baǵdarlamalar, jobalardy qarjylandyrý tetikteri, bilim berý jáne akseleratsiialyq baǵdarlamalar, konsýltatsiialyq, saraptamalyq, aqparattyq jáne tsifrlyq qoldaý quraldary týraly málimetter toptastyrylǵan. Sonymen qatar paidalanýshylar túrli baiqaýlarǵa, pitching sessiialaryna, forýmdarǵa, kórmeler men ózge de salalyq is-sharalarǵa qatysý múmkindigine ie bolady.
"Platformaǵa tirkelý úshin www.qazaqculture.com portalyndaǵy QazaqCreative bólimine ótip, tirkeý nysanyn toltyrý qajet. Moderatsiiadan ótkennen keiin paidalanýshynyń jeke kabineti ashylady", – dep naqtylady qor.
Sondai-aq platforma tek kreatorlarǵa ǵana emes, olardyń ónimderi men qyzmetterine qyzyǵýshylyq tanytqan kópshilikke de qoljetimdi bolatyny aityldy.
Qordyń baǵalaýynsha, QazaqCreative platformasy Qazaqstandaǵy kreativti ekonomikany damytýǵa baǵyttalǵan mańyzdy bastamalardyń birine ainalady. Aldaǵy ýaqytta uiym kreatorlardy qoldaý, shyǵarmashylyq kásipkerlikti damytý, salalyq jobalardy ilgeriletý jáne ulttyq kreativti indýstriianyń básekege qabilettiligin arttyrý baǵytyndaǵy jumystardy jalǵastyrmaq.
