قازاقستان رەسپۋبليكاسى مەدەنيەت جەنە اقپارات مينيسترلٸگٸنٸڭ قولداۋىمەن كرەاتيۆتٸ يندۋسترييالاردى دامىتۋ قورى QazaqCreative بٸرىڭعاي تسيفرلىق پلاتفورماسىن ٸسكە قوستى. جاڭا تسيفرلىق پلاتفورما كرەاتورلارعا مەملەكەتتٸك قولداۋ تەتٸكتەرٸن بٸر جٷيە ارقىلى پايدالانۋعا مٷمكٸندٸك بەرەدٸ, دەپ حابارلايدى dalanews.kz.
قوردىڭ حابارلاۋىنشا, پلاتفورما جەكە جەنە زاڭدى تۇلعالارعا ارنالعان. ولاردىڭ قاتارىندا اۆتورلار, ديزاينەرلەر, سۋرەتشٸلەر, فوتوگرافتار, مۋزىكانتتار, قولٶنەرشٸلەر, سونداي-اق شىعارماشىلىق ستۋدييالار, اگەنتتٸكتەر, پروديۋسەرلٸك ورتالىقتار جەنە كرەاتيۆتٸ يندۋسترييا سالاسىندا جۇمىس ٸستەيتٸن ٶزگە دە ۇيىمدار بار.
ەندٸ كرەاتورلار www.qazaqculture.com پورتالىنداعى QazaqCreative بٶلٸمٸ ارقىلى تٸركەلٸپ, جەكە كابينەتٸن اشىپ, پلاتفورماداعى تسيفرلىق سەرۆيستەردٸ پايدالانا الادى.
"تٸركەلگەن پايدالانۋشىلار ٶز پروفيلٸن باسقارىپ, جوبالارى مەن قىزمەتتەرٸ تۋرالى اقپارات جارييالاي الادى. سونداي-اق مەملەكەتتٸك قولداۋ باعدارلامالارىنا قاتىسۋعا ٶتٸنٸم بەرٸپ, حابارلامالار الىپ وتىرادى", – دەلٸنگەن حابارلامادا.
قوردىڭ مەلٸمەتٸنشە, پلاتفورمادا گرانتتىق باعدارلامالار, جوبالاردى قارجىلاندىرۋ تەتٸكتەرٸ, بٸلٸم بەرۋ جەنە اكسەلەراتسييالىق باعدارلامالار, كونسۋلتاتسييالىق, ساراپتامالىق, اقپاراتتىق جەنە تسيفرلىق قولداۋ قۇرالدارى تۋرالى مەلٸمەتتەر توپتاستىرىلعان. سونىمەن قاتار پايدالانۋشىلار تٷرلٸ بايقاۋلارعا, پيتچينگ سەسسييالارىنا, فورۋمدارعا, كٶرمەلەر مەن ٶزگە دە سالالىق ٸس-شارالارعا قاتىسۋ مٷمكٸندٸگٸنە يە بولادى.
"پلاتفورماعا تٸركەلۋ ٷشٸن www.qazaqculture.com پورتالىنداعى QazaqCreative بٶلٸمٸنە ٶتٸپ, تٸركەۋ نىسانىن تولتىرۋ قاجەت. مودەراتسييادان ٶتكەننەن كەيٸن پايدالانۋشىنىڭ جەكە كابينەتٸ اشىلادى", – دەپ ناقتىلادى قور.
سونداي-اق پلاتفورما تەك كرەاتورلارعا عانا ەمەس, ولاردىڭ ٶنٸمدەرٸ مەن قىزمەتتەرٸنە قىزىعۋشىلىق تانىتقان كٶپشٸلٸككە دە قولجەتٸمدٸ بولاتىنى ايتىلدى.
قوردىڭ باعالاۋىنشا, QazaqCreative پلاتفورماسى قازاقستانداعى كرەاتيۆتٸ ەكونوميكانى دامىتۋعا باعىتتالعان ماڭىزدى باستامالاردىڭ بٸرٸنە اينالادى. الداعى ۋاقىتتا ۇيىم كرەاتورلاردى قولداۋ, شىعارماشىلىق كەسٸپكەرلٸكتٸ دامىتۋ, سالالىق جوبالاردى ٸلگەرٸلەتۋ جەنە ۇلتتىق كرەاتيۆتٸ يندۋسترييانىڭ بەسەكەگە قابٸلەتتٸلٸگٸن ارتتىرۋ باعىتىنداعى جۇمىستاردى جالعاستىرماق.
