Memleket basshysy "Áskeri qyzmettiń belgilengen merzimin ótkergen merzimdi áskeri qyzmettegi áskeri qyzmetshilerdi zapasqa shyǵarý jáne Qazaqstan Respýblikasynyń azamattaryn 2026 jyldyń naýryz-maýsymynda jáne qyrkúiek-jeltoqsanynda merzimdi áskeri qyzmetke kezekti shaqyrý týraly" jarlyqqa qol qoidy, dep habarlaidy Dalanews.kz.
Prezident jarlyǵyna sáikes 17 naýryzdan bastap qalalyq jáne aýdandyq shaqyrý komissiialary azamattardy merzimdi áskeri qyzmetke shaqyrýdy bastady.
"30 maýsymǵa deiin 18-27 jas aralyǵyndaǵy 21 myńnan asa azamatty Qarýly kúshterdiń, basqa da ásker men áskeri quralymdardyń qataryna shaqyrý josparlanyp otyr. Onyń ishinde 11 myńnan asa adam Qarýly kúshterge, 7 myńnan asa adam IIM Ulttyq ulanǵa, 2 myńǵa jýyq adam UQK Shekara qyzmetine, 400-ge jýyq adam Tótenshe jaǵdailar ministrligine, 300 adam Memlekettik kúzet qyzmetine shaqyrylady", – dedi QR Qarýly kúshteri Bas shtaby Uiymdastyrý-jumyldyrý jumystary departamentiniń bastyǵy general-maior Almas Isabekov.
Ol azamattarǵa shaqyrý SMS-habarlama jáne eGov portalyndaǵy habarlandyrýlar arqyly keminde úsh kún buryn jiberiletinin eske saldy. Mundai habarlamalar resmi shaqyrý bolyp esepteledi. Shaqyrtý alǵan azamat jergilikti áskeri basqarý organyna nemese shaqyrý pýnktine kelýge mindetti.
