Qazaqstan Úkimeti kásipkerlerge qatysty jańa qaýly qabyldady. Soǵan sáikes, 2026 jylǵy 19 shildeden bastap qolma-qol aqshasyz tólem qabyldaýǵa mindetti biznes túrleriniń tizimi keńeiedi, dep habarlaidy dalanews.kz.
Ózgerister «Tólemder jáne tólem júieleri týraly» zańǵa engizilip, POS-terminaldar men mobildi tólem qabyldaityn qurylǵylardy qoldanýdy mindetteidi. Jańashyldyqtar men aiyppul mólsheri týraly Memlekettik kirister komiteti Qaz365.kz redaktsiiasynyń saýalyna bergen resmi jaýabynda málimdedi.
Kimder karta jáne mobildi tólem qabyldaýǵa mindetti?
Úkimet qaýlysyna sáikes, qolma-qol aqshasyz jáne mobildi tólemderdi qabyldaityn jabdyqtardy ornatý mindetti bolatyn qyzmet túrleriniń jańartylǵan tizimi 18 baǵyttan turady:
Avtokólik pen mototsiklderdi kóterme jáne bólshek saýdada satý, jóndeý jáne tehnikalyq qyzmet kórsetý;
Kóterme jáne bólshek saýda;
Qonaqúi qyzmetteri;
Meiramhana, qoǵamdyq tamaqtandyrý jáne sýsyn usyný qyzmetteri;
Áýe jáne temirjol kóligine jol júrý biletterin, júk jáne bagaj túbirtekterin satý;
Júkterdi óńdeý, qoimalaý, saqtaý jáne tasymaldaýǵa bailanysty qyzmetter;
Týroperatorlardyń jáne týrizm salasyndaǵy ózge uiymdardyń qyzmeti (týragentterden basqa);
Saqtandyrý qyzmeti;
Densaýlyq saqtaý salasy;
Bilim berý salasy;
Kinofilmderdi, beine jáne telebaǵdarlamalardy taratý, kino kórsetý qyzmeti;
Sport, demalys jáne oiyn-saýyq salasyndaǵy qyzmetter;
Qumar oiyndar men bás tigý qyzmeti;
Boýling pen biliard qyzmetteri;
Poshta jáne kýrerlik qyzmetter;
Shashtarazdar men sulýlyq salondarynyń qyzmeti;
Mamandandyrylǵan dizainerlik qyzmet;
Ǵimarattarǵa qyzmet kórsetý jáne aýmaqtardy abattandyrý qyzmeti.
Nelikten jańa qyzmet túrleri qosyldy?
Memlekettik organdardyń túsindirýinshe, sońǵy bes jylda atalǵan salalardaǵy kásipkerler sany aitarlyqtai artqan.
Ásirese kýrerlik qyzmetterge, sulýlyq salondaryna jáne dizainerlik qyzmetterge suranys kóbeigen. Sondyqtan tutynýshylar úshin zamanaýi tólem jasaý múmkindigin qamtamasyz etý qajettiligi týyndaǵan.
Kimderge jeńildik qarastyrylǵan?
Qujattaǵy eskertpege sáikes, telekommýnikatsiia jelisi joq eldi mekenderde nemese aýmaqtarda jumys isteitin kásipkerlerge bul talap qoldanylmaidy. Sondai-aq statsionarlyq emes saýda nysandary arqyly qyzmet kórsetetin kásipkerler de POS-terminal ornatýdan bosatylady.
Terminal ornatpaǵandarǵa qandai jaza qoldanylady?
Memlekettik kirister komiteti ákimshilik jaýapkershilik kezeń-kezeńimen qoldanylatynyn habarlady. Ákimshilik quqyq buzýshylyq týraly kodekstiń 195-babyna sáikes, eger jeke kásipkerde nemese zańdy tulǵada tólem kartalaryn qabyldaityn qurylǵy bolmasa, alǵash ret anyqtalǵan jaǵdaida tek resmi eskertý beriledi.
Al eger bir jyl ishinde zańbuzýshylyq qaitalansa, kásipkerge aiyppul salynady:
shaǵyn biznes sýbektilerine – 40 AEK;
orta biznes sýbektilerine – 60 AEK;
iri biznes sýbektilerine – 80 AEK.
Osylaisha, 2026 jylǵy 19 shildeden bastap qolma-qol aqshasyz tólem qabyldaý talaptary Qazaqstandaǵy kásipkerlik qyzmettiń taǵy birneshe salasyna mindetti norma retinde engiziledi.
