Қазақстан Үкіметі кәсіпкерлерге қатысты жаңа қаулы қабылдады. Соған сәйкес, 2026 жылғы 19 шілдеден бастап қолма-қол ақшасыз төлем қабылдауға міндетті бизнес түрлерінің тізімі кеңейеді, деп хабарлайды dalanews.kz.
Өзгерістер «Төлемдер және төлем жүйелері туралы» заңға енгізіліп, POS-терминалдар мен мобильді төлем қабылдайтын құрылғыларды қолдануды міндеттейді. Жаңашылдықтар мен айыппұл мөлшері туралы Мемлекеттік кірістер комитеті Qaz365.kz редакциясының сауалына берген ресми жауабында мәлімдеді.
Кімдер карта және мобильді төлем қабылдауға міндетті?
Үкімет қаулысына сәйкес, қолма-қол ақшасыз және мобильді төлемдерді қабылдайтын жабдықтарды орнату міндетті болатын қызмет түрлерінің жаңартылған тізімі 18 бағыттан тұрады:
Автокөлік пен мотоциклдерді көтерме және бөлшек саудада сату, жөндеу және техникалық қызмет көрсету;
Көтерме және бөлшек сауда;
Қонақүй қызметтері;
Мейрамхана, қоғамдық тамақтандыру және сусын ұсыну қызметтері;
Әуе және теміржол көлігіне жол жүру билеттерін, жүк және багаж түбіртектерін сату;
Жүктерді өңдеу, қоймалау, сақтау және тасымалдауға байланысты қызметтер;
Туроператорлардың және туризм саласындағы өзге ұйымдардың қызметі (турагенттерден басқа);
Сақтандыру қызметі;
Денсаулық сақтау саласы;
Білім беру саласы;
Кинофильмдерді, бейне және телебағдарламаларды тарату, кино көрсету қызметі;
Спорт, демалыс және ойын-сауық саласындағы қызметтер;
Құмар ойындар мен бәс тігу қызметі;
Боулинг пен бильярд қызметтері;
Пошта және курьерлік қызметтер;
Шаштараздар мен сұлулық салондарының қызметі;
Мамандандырылған дизайнерлік қызмет;
Ғимараттарға қызмет көрсету және аумақтарды абаттандыру қызметі.
Неліктен жаңа қызмет түрлері қосылды?
Мемлекеттік органдардың түсіндіруінше, соңғы бес жылда аталған салалардағы кәсіпкерлер саны айтарлықтай артқан.
Әсіресе курьерлік қызметтерге, сұлулық салондарына және дизайнерлік қызметтерге сұраныс көбейген. Сондықтан тұтынушылар үшін заманауи төлем жасау мүмкіндігін қамтамасыз ету қажеттілігі туындаған.
Кімдерге жеңілдік қарастырылған?
Құжаттағы ескертпеге сәйкес, телекоммуникация желісі жоқ елді мекендерде немесе аумақтарда жұмыс істейтін кәсіпкерлерге бұл талап қолданылмайды. Сондай-ақ стационарлық емес сауда нысандары арқылы қызмет көрсететін кәсіпкерлер де POS-терминал орнатудан босатылады.
Терминал орнатпағандарға қандай жаза қолданылады?
Мемлекеттік кірістер комитеті әкімшілік жауапкершілік кезең-кезеңімен қолданылатынын хабарлады. Әкімшілік құқық бұзушылық туралы кодекстің 195-бабына сәйкес, егер жеке кәсіпкерде немесе заңды тұлғада төлем карталарын қабылдайтын құрылғы болмаса, алғаш рет анықталған жағдайда тек ресми ескерту беріледі.
Ал егер бір жыл ішінде заңбұзушылық қайталанса, кәсіпкерге айыппұл салынады:
шағын бизнес субъектілеріне – 40 АЕК;
орта бизнес субъектілеріне – 60 АЕК;
ірі бизнес субъектілеріне – 80 АЕК.
Осылайша, 2026 жылғы 19 шілдеден бастап қолма-қол ақшасыз төлем қабылдау талаптары Қазақстандағы кәсіпкерлік қызметтің тағы бірнеше саласына міндетті норма ретінде енгізіледі.
