Qazaqstanda júrgizýshi kýáligin alý talaptary ózgeredi, dep habarlaidy Dalanews.kz.
Endi azamattar júrgizýshi kýáligin alý úshin emtihandy aqyly negizde, aralyqty keminde 10 kún saqtai otyryp, shekteýsiz tapsyra alady. Qazir azamattarǵa 3 tegin múmkindik beriledi: alǵashqy eki múmkindik 1 kún aralyqpen, úshinshisi 30 kúnnen keiin. Osy múmkindikter aiaqtalǵan soń qaita oqý talap etiletin. Bul keibir jaǵdailarda azamattardy júrgizýshi kýáligin zańsyz jolmen alýǵa itermeleitin.
Sonymen qatar, Ǵylym jáne joǵary bilim ministrligi Ulttyq testileý ortalyǵynyń Astana qalasyndaǵy filialy bazasynda pilottyq joba sheńberinde osy ortalyqta qoldanylatyn akademiialyq adaldyqty qamtamasyz etý tehnologiialary synaqtan ótkiziledi. Keiin bul tehnologiialardy júrgizýshi kýáligin alý úshin teoriialyq emtihan tapsyrýdyń búkil júiesinde qoldaný josparlanyp otyr. Tehnologiialardy aprobatsiialaýmen qatar, Ulttyq testileý ortalyǵy teoriialyq emtihan testilerine keshendi psihometriialyq zertteý júrgizedi.
Budan bólek, emtihan ótkizý protsesine jasandy intellekt tehnologiialary engiziledi. Teoriialyq emtihan qabyldaý kezinde tolyqtyrylǵan shynaiylyq (AR), al praktikalyq emtihandy baqylaýda kompiýterlik kórý (Computer Vision) tehnologiiasy qoldanylady. Bul tyiym salynǵan tehnikalyq quraldardy paidalaný qaýpin azaityp, zańbuzýshylyqtardy tirkeýge múmkindik beredi.
Besinshiden, júrgizýshi kýáligin alýǵa qatysty tsifrlyq sheshimderdiń aqparattyq qaýipsizdigin barynsha kúsheitý kózdeledi.
Ákimshilik jaýapkershilikke qatysty normalardy engizý de qarastyrylǵan. Bul jaýapkershilik qyzmet alýshylarǵa da, júrgizýshi kýáligin zańsyz alýǵa járdem kórsetetin tulǵalarǵa da qoldanylady. Sharalar emtihan tapsyrý protsesinde zańbuzýshylyqtar anyqtalǵan jaǵdaida qabyldanady. Olardyń qataryna tyiym salynǵan qurylǵylardy, mikroqulaqqaptardy, mikrokameralardy, sondai-aq, bailanys signaldaryn qabyldaityn jáne taratatyn quraldardy paidalaný jatady. Budan bólek, teoriialyq emtihan tapsyrý quqyǵynan 1 jylǵa aiyrý múmkindigi engiziledi.
Avtomektepterdiń qyzmetine qoiylatyn talaptardy kúsheitý kózdeledi. Olardyń jumysyn baǵalaý kezinde júrgizýshilerdi daiarlaý sapasy men azamattardyń keri bailanysy eskeriledi. Sondai-aq, olardyń qyzmetin litsenziialaý josparlanyp otyr. Júrgizýshilerdi daiarlaý sapasy tómen bolǵan jaǵdaida litsenziiany tolyq keri qaitaryp alý sharasy qarastyrylady.
