Qazaqstanda jyl basynan beri esirtki biznesine qarsy kúres aiasynda 50-ge jýyq jasóspirim ustaldy, dep habarlaidy Dalanews.kz.
"Ishki ister ministrligi «Zań jáne Tártip» qaǵidaty aiasynda esirtkiniń zańsyz ainalymyna qarsy júieli jumystardy jalǵastyryp, kámeletke tolmaǵandardy qylmystyq áreketterge tartýdyń aldyn alýǵa erekshe kóńil bólýde. Jyl basynan beri esirtki qylmystaryna qatysy bar 49 jasóspirim ustaldy", – delingen juma kúni taratylǵan habarlamada.
Vedomstvo málimetinshe, tek tamyz aiynda osyndai alty derek tirkelgen, onyń bireýi esirtki qoldaný faktisine qatysty.
"Máselen, Abai oblysynda kolledjdiń 16 jastaǵy stýdenti men onyń 15 jastaǵy qurbysy – mektep oqýshysy ustaldy. Tekserý barysynda mektep oqýshysynan asa iri kólemde sintetikalyq esirtki tárkilendi. Al stýdent «qoimashy» (esirtkini jasyryn qoiyp taratýshy) retinde jumys istep, esirtkini qurbysynyń sómkesine jasyryp, keiin taratýǵa tyrysqan. Shymkentte de ár kezeńde eki 17 jastaǵy jasóspirim esirtkini jasyryn taratqany úshin ustaldy", – delingen habarlamada.
Politsiia ókilderi mundai jaǵdailardyń qoǵamda alańdaýshylyq týdyryp otyrǵanyn atap ótti.
"IIM ata-analarǵa, ustazdarǵa jáne balalardyń tárbiesine jaýapty azamattarǵa úndeý jasaidy: jasóspirimderdiń minez-qulqyndaǵy ózgeristerge nazar aýdaryńyzdar, olar kimmen aralasatynyn, ýaqytyn qaida ótkizetinin qadaǵalańyzdar, telefondary men messendjerlerin kúmándi hat-habarlar bar-joǵyna tekserińizder, balalarmen esirtkiniń qaýiptiligi men saldary týraly jii áńgimelesińizder. Esterińizge salamyz: esirtki taratý úshin 5 jyldan 20 jylǵa deiin bas bostandyǵynan aiyrý jazasy qarastyrylǵan. Ishki ister ministrligi óskeleń urpaqty qorǵaý jáne azamattardyń qaýipsizdigin qamtamasyz etý baǵytyndaǵy júieli jumysyn jalǵastyra beredi", – delingen IIM habarlamasynda.
