Қазақстанда жыл басынан бері есірткі бизнесіне қарсы күрес аясында 50-ге жуық жасөспірім ұсталды, деп хабарлайды Dalanews.kz.

"Ішкі істер министрлігі «Заң және Тәртіп» қағидаты аясында есірткінің заңсыз айналымына қарсы жүйелі жұмыстарды жалғастырып, кәмелетке толмағандарды қылмыстық әрекеттерге тартудың алдын алуға ерекше көңіл бөлуде. Жыл басынан бері есірткі қылмыстарына қатысы бар 49 жасөспірім ұсталды", – делінген жұма күні таратылған хабарламада.

Ведомство мәліметінше, тек тамыз айында осындай алты дерек тіркелген, оның біреуі есірткі қолдану фактісіне қатысты.

"Мәселен, Абай облысында колледждің 16 жастағы студенті мен оның 15 жастағы құрбысы – мектеп оқушысы ұсталды. Тексеру барысында мектеп оқушысынан аса ірі көлемде синтетикалық есірткі тәркіленді. Ал студент «қоймашы» (есірткіні жасырын қойып таратушы) ретінде жұмыс істеп, есірткіні құрбысының сөмкесіне жасырып, кейін таратуға тырысқан. Шымкентте де әр кезеңде екі 17 жастағы жасөспірім есірткіні жасырын таратқаны үшін ұсталды", – делінген хабарламада.

Полиция өкілдері мұндай жағдайлардың қоғамда алаңдаушылық тудырып отырғанын атап өтті.

"ІІМ ата-аналарға, ұстаздарға және балалардың тәрбиесіне жауапты азаматтарға үндеу жасайды: жасөспірімдердің мінез-құлқындағы өзгерістерге назар аударыңыздар, олар кіммен араласатынын, уақытын қайда өткізетінін қадағалаңыздар, телефондары мен мессенджерлерін күмәнді хат-хабарлар бар-жоғына тексеріңіздер, балалармен есірткінің қауіптілігі мен салдары туралы жиі әңгімелесіңіздер. Естеріңізге саламыз: есірткі тарату үшін 5 жылдан 20 жылға дейін бас бостандығынан айыру жазасы қарастырылған. Ішкі істер министрлігі өскелең ұрпақты қорғау және азаматтардың қауіпсіздігін қамтамасыз ету бағытындағы жүйелі жұмысын жалғастыра береді", – делінген ІІМ хабарламасында.