2025 jyly Qazaqstanda et óndirisiniń kólemi 1,2 mln tonnaǵa jetip, ótken jylmen salystyrǵanda 2,7% ósti, dep habarlaidy Dala News.
Aýyl sharýashylyǵy ministrliginiń málimetinshe, mal sharýashylyǵynda oń dinamika saqtalyp otyr. Iri qara mal sany 8,2 mln basqa jetip, 2,4% artqan. Qoi men eshki 20,6 mln basty qurady, bul ótken jylmen salystyrǵanda 1,6% kóp. Jylqy sany 4,6 mln basqa deiin ósip, 5,6% ulǵaidy. Sondai-aq túie basy 294 myńǵa jetse, qus sany 48,6 mln basqa deiin kóbeigen.
Et óndirisimen qatar sút jáne jumyrtqa óndirisinde de ósim baiqalady. Siyr sútiniń kólemi 5% artyp, 3,8 mln tonnaǵa jetken. Al jumyrtqa óndirisi 2,4% ósip, 4,6 mlrd dana bolǵan.
Ministrliktiń habarlaýynsha, Qazaqstan siyr eti, qoi eti, jylqy eti jáne taǵamdyq jumyrtqa boiynsha ishki naryqty tolyq qamtamasyz etip otyr. Qazirgi tańda eksporttyq áleýetti arttyrýǵa basymdyq berilgen.
2025 jyldyń 11 aiynyń qorytyndysy boiynsha et eksporty 24,8% ósip, 91,3 myń tonnaǵa jetken. Onyń ishinde siyr etiniń eksporty 59,1%, al qoi etiniń eksporty 92,8% artqan.
Ministrlik aldaǵy jyldary mal sharýashylyǵyn damytýdyń 2026–2030 jyldarǵa arnalǵan keshendi jospary aiasynda óndiris kólemin odan ári ulǵaitý kózdelip otyrǵanyn atap ótti. Josparǵa sáikes, 2030 jylǵa qarai et óndirisi 1,8 mln tonnaǵa, al et eksporty 165 myń tonnaǵa deiin jetkizilýi tiis.
