Qazaqstan Respýblıkasynyń Densaýlyq saqtaý mınıstri 2025 jylǵy 12 qyrkúıektegi buıryǵymen el halqyn sýrdologıalyq kómekpen qamtamasyz etý qaǵıdalaryna ózgerister engizdi, dep habarlaıdy Dalanews.kz.

Estý fýnksıasynyń buzylýyn óteıtin medısınalyq buıymdarmen qamtamasyz etý jáne olardy aýystyrý jumystary Qazaqstan Respýblıkasy Eńbek jáne halyqty áleýmettik qorǵaý mınıstriniń 2023 jylǵy 30 maýsymdaǵy №287 buıryǵymen bekitilgen «Múgedektigi bar adamdardy protezdik-ortopedıalyq kómekpen, tehnıkalyq kómekshi (kompensatorlyq) jáne múgedektigi bar adamnyń jeke ońaltý jáne abılıtasıa baǵdarlamasyna sáıkes olardy aýystyrý merzimderin retteıtin talaptarǵa saı júzege asyrylady.

Sondaı-aq bul is-sharalar 2023 jylǵy 30 maýsymdaǵy №284 buıryqpen bekitilgen «Múgedektigi bar adamdarǵa usynylatyn tehnıkalyq kómekshi (kompensatorlyq) quraldardyń, arnaıy qozǵalys quraldarynyń jáne qyzmetterdiń jikteýishine» sáıkes júrgiziledi.

Medısınalyq kórsetkishter boıynsha múgedektigi joq azamattardy estý protezimen qamtamasyz etý týraly sheshim jergilikti ókildi organdardyń sheshimi negizinde qabyldanady.

Oblystardyń, respýblıkalyq mańyzy bar qalalardyń jáne Astananyń jergilikti memlekettik densaýlyq saqtaý organdary óz ókilettigi sheńberinde.

Medısınalyq kórsetkishter boıynsha múgedektigi joq azamattardy estý protezimen   qamtamasyz etý úshin medısınalyq buıymdardy satyp alýdy júzege asyrady.

Estý fýnksıasynyń 1,2,3 nemese 4 dárejeli sozylmaly (qaıtymsyz) buzylysy bar, biraq múgedektik mártebesi joq tulǵalardy medısınalyq buıymdarmen qamtamasyz etý jáne olardy aýystyrý jumystary jergilikti búdjet qarajaty esebinen júrgiziledi.

Qaǵıdalarda estý protezi (estý apparaty) arqyly qamtamasyz etý otorınolarıngolog (sýrdolog) dárigeriniń qorytyndysy negizinde júrgiziletin aýdıologıalyq tekserýden keıin ǵana júzege asyrylatyny kórsetilgen.

Sondaı-aq engizilgen ózgeristerge sáıkes, bastapqy medısınalyq-sanıtarıalyq kómek (BMSK) uıymdarynda jyl saıyn úsh jasqa deıingi ( qosa alǵanda) jas balalarǵa arnalǵan ámbebap aýdıologıalyq skrınıng júrgizý belgilengen.

Skrınıng otoakýstıkalyq emısıany tirkeý jáne qysqalatentti estý jaýap potensıaldaryn anyqtaý ádisteri arqyly júzege asyrylady.

Atalǵan buıryq 2025 jylǵy 28 qyrkúıekten bastap kúshine enedi.                                                                                                              

Avtory: Asel Qaıratqyzy