2025 jylǵy 11 tamyzdan bastap Qazaqstanda elektrondyq sıfrlyq qoltańbany (ESQ) tek bıometrıalyq sáıkestendirýden ótý arqyly ǵana alýǵa bolady. AL HQKO-ǵa tek atalǵan tásil nátıje bermegen jaǵdaıda ǵana bara alasyz, dep habarlaıdy Dalanews.kz.
Sıfrlyq damý, ınovasıalar jáne aeroǵarysh ónerkásibi mınıstrligi bul qyzmetti tolyǵymen onlaın-formatqa aýystyrady.
"Bul sheshim azamattardyń derbes derekterin qorǵaý deńgeıin arttyrý jáne jeke sıfrlyq derekterdiń qaýipsizdigin qamtamasyz etýge baǵyttalǵan. Ol elektrondyq qoltańbany bógde tulǵalarǵa alý jaǵdaıynyń aldyn alady. Buryn ESQ kiltterin onlaın da, HQKO-da da alýǵa bolatyn. Endi bul prosedýra tolyqtaı onlaın formatqa kóshirildi", delingen vedomstvo habarlamasynda.
ESQ-ny onlaın qalaı alýǵa bolady:
- egov.kz nemese pki.gov.kz portalyna kirińiz;
- Onlaın ótinim jiberińiz;
- Bıometrıalyq sáıkestendirýden ótińiz – júıe kamera arqyly bet-álpetińizdi tanıdy.
Eger tulǵa sátti rastalsa, ESQ kilti birden, HQKO qyzmetkerleriniń qatysýynsyz onlaın túrde beriledi. Keıde júıe sizdi tanı almaýy múmkin, mysaly bazada fotosýret bolmasa nemese tehnıkalyq aqaý oryn alsa, júıe 5 retke deıin bıometrıalyq tekserýden ótkizýge múmkindik beredi. Osy áreketter sátsiz aıaqtalǵan soń ǵana HQKO-ǵa júginý múmkindigi paıda bolady.
"Bıometrıadan ótpeıinshe, HQKO-da operator arqyly ótinish berý múmkin emes. Operator JSN boıynsha aqparatty tekseredi jáne eger bes ret sátsiz bıometrıa tapsyrý áreketi bolmaǵan jaǵdaıda, qyzmet kórsete almaıdy. Onlaın qyzmet tolyq paıdalanylǵannan keıin ǵana HQKO arqyly ótinish berý múmkindigi avtomatty túrde ashylady. Internetke nemese kompúterge qoljetimdiligi joq azamattar úshin HQKO-nyń ózine-ózi qyzmet kórsetý aımaqtarynda bıometrıadan ótý múmkindigi qarastyrylǵan. Eger paıdalanýshy sol jerde sátti ıdentıfıkasıadan ótse, ESQ kiltteri HQKO operatorynyń qatysýynsyz onlaın túrde beriledi",- deıdi mamandar.
Qazaqstanda ESQ berý prosesiniń negizinen qashyqtan formatqa aýysqany statısıkalyq derektermen rastalady. 2025 jyldyń basynan beri respýblıka boıynsha 14,9 mıllıonnan astam ESQ kilti berildi. Sonyń ishinde 92,25%-y qashyqtan sáıkestendirý arqyly, al nebári 7,75%-y HQKO arqyly rásimdelgen. Bul derekter onlaın-servıstiń joǵary suranysqa ıe ekenin jáne memlekettik qyzmetterdiń sıfrlandyrý baǵytynda turaqty úrdis qalyptasqanyn kórsetedi.
Bul jańashyldyq aqparattyq qaýipsizdik deńgeıin arttyrýǵa baǵyttalǵan. ESQ óz qolymen qoıylǵan qoltańbaǵa teńestiriledi jáne tolyq zańdy kúshke ıe, sondyqtan ESQ kiltterine qoljetimdilik tek onyń ıesinde ǵana bolady. Bıometrıany qoldaný jeke tulǵany senimdi túrde rastaýǵa jáne ESQ kiltterin zańsyz alý jaǵdaılarynyń aldyn alýǵa múmkindik beredi.
Buǵan deıin Qazaqstanda barlyq kásipkerler bıometrıalyq sáıkestendirýden ótýge mindettelgeli jatqanyn jazǵanbyz.
