Qarjy naryǵyn retteý jáne damytý agenttigi qazaqstandyqtarǵa nesie berý talaptaryn qatańdatatyn jańa qaýly jobasyn daiyndady. Qujattyń basty maqsaty tutynýshylyq nesieniń shamadan tys ósýin tejeý jáne azamattardyń shekten tys qaryzǵa batýynyń aldyn alý, dep habarlaidy Dalanews.kz.
Jobaǵa sáikes, keiingi 12 ai ishinde 90 kúnnen asa merzimi ótken qaryzy bar adamdar úshin qaryz júktemesi koeffitsienti (QJK) 0,5-ten 0,25-ke deiin qysqartylady. Bul kórsetkish qaryz alýshynyń tabysyna shaqqandaǵy ai saiynǵy tólemderin ólsheidi. Iaǵni, tómendetilgen koeffitsient mundai azamattarǵa jańa nesie alý múmkindigin aitarlyqtai shekteidi.
Sonymen qatar bankter kepilsiz tutynýshylyq nesie berýdi kelesi jaǵdailarda shektemek:
- eger banktik qaryzdar boiynsha 30 kúnnen astam nemese mikrokreditter boiynsha bir kúnnen artyq merzimi ótken qaryz bolsa;
- 2025 jylǵy 1 shildeden bastap sońǵy 36 ai ishinde negizgi qaryz nemese syiaqy tolyq keshirilgen jaǵdaida;
- sońǵy 12 ai ishinde restrýktýrizatsiia jasalyp, biraq qaryz alýshy óz mindettemesin durys oryndamaǵan bolsa.
Budan bólek, bankter qaryz alýshynyń kredittik tarihyn paidalanyp, onyń qaryzdary men restrýktýrizatsiiasyn tekserýge quqyly.
Restrýktýrizatsiia kelesi jaǵdailarda tiimsiz dep tanylady:
- alty ai ishinde qaryz kólemi keminde 5%-ǵa azaimaǵan bolsa;
- sońǵy bir jylda eki jáne odan da kóp ret restrýktýrizatsiia jasalsa;
- syiaqy mólsheri negizgi qaryzdyń 20%-ynan asyp ketse;
- jańa nesie eski qaryzdyń tek qana merzimi ótken bóligin jabýǵa berilse.
Eske salaiyq, buǵan deiin Qazaqstanda jańa nesie alý qiyndaityny týraly jazǵan edik. Endi bankterde tólemdi 90 kún emes, 30 kún keshiktirseńiz, jańa nesie rásimdei almaisyz. Bul týraly Qarjy naryǵyn damytý agenttiginiń tóraiymy Mádina Ábilqasymova málimdedi.
Mikrokredit uiymdary úshin talap budan da qatań bolmaq: eger qaryzdy bir kún keshiktirseńiz, jańa qaryz alý múmkindigińiz bolmaidy.
Ábilqasymovanyń aitýynsha, bul shara azamattardyń qarjylyq tártibin baqylaýdy kúsheitýge baǵyttalǵan. Ereje qaryz alýshylardy ýaqytynda tólem jasaýǵa yntalandyrady dep kútilýde. Osylaisha, adamdar nesielerin durys basqaryp, qaryzdaryn der kezinde óteidi degen senim bar.
Eger qaryz alýshynyń qarjylyq jaǵdaiy jaqsaryp, turaqty tabysqa qol jetkizse, shekteýler alynyp tastalady.
