Qazaqstanda eń joǵary jalaqy mólsheri Atyraý oblysynyń turǵyndaryna tiesili. Olardyń ortasha tabysy 600 myń teńgege jýyqtaǵan, dep habarlaidy Dalanews.kz.
Ulttyq statistika biýrosynyń málimetinshe, Qazaqstan Respýblikasy boiynsha ataýly jalaqynyń ortasha máni 2023 jylǵy IV toqsanda 393 605 teńge bolǵan.
"2022 jyldyń tiisti toqsanyna qaraǵanda ósim 16,2 paiyzǵa, naqty mánde – 5,3 paiyzǵa ósti. Jalaqynyń medianalyq máni (jalaqy qatarynyń ortalyq deńgeii) 2023 jylǵy IV toqsanda baǵalaý boiynsha 259 463 teńge boldy. 4-toqsanda ortasha jalaqy mólsheriniń ósýi jyl qorytyndysy boiynsha qosymsha tólemder men merekelik syiaqylar esebinen eńbekaqy qorynyń ulǵaiýymen bailanysty", - delingen habarlamada.
2022 jylǵy tiisti toqsanmen salystyrǵanda ortasha ailyq jalaqynyń eń joǵarǵy ósimi qarjy jáne saqtandyrý qyzmeti – 29,7 paiyz, aqparat jáne bailanys – 23,2 paiyz, óner, oiyn-saýyq jáne demalys – 20,8 paiyz, salalarynda baiqaldy. Bilim berýde ortasha ailyq jalaqynyń ósýi 18,6 paiyz, densaýlyq saqtaý jáne halyqqa áleýmettik qyzmet kórsetýde – 18,2 paiyz.
"Óńirlik bóliniste 2022 jylǵy tiisti toqsanmen salystyrǵanda ortasha ailyq ataýly jalaqynyń eń joǵary ósimi Ulytaý oblysynda tirkeldi – 23,5 paiyz. Eń tómengi ósimi Atyraý oblysynda baiqaldy – 6,4 paiyz.
Óńirler arasyndaǵy ortasha ailyq nominaldy jalaqynyń eń joǵary jáne eń tómengi mánderi arasyndaǵy araqatynas 2023 jylǵy IV toqsanda 2,1 ese boldy", - delingen habarlamada.
