Qazaqstanda kóktemgi egis jumystaryn baqylaýǵa arnalǵan jasandy intellekt elementteri bar tsifrlyq platforma pilottyq rejimde iske qosyldy, dep habarlaidy dalanews.kz.
Úkimet otyrysynda aýyl sharýashylyǵy vitse-ministri Azat Sultanov ministrlik Jasandy intellekt jáne tsifrlyq damý ministrligimen birlesip egis naýqany týraly derekterdi jinaýǵa arnalǵan platformany ázirlegenin aitty.
Onyń sózinshe, qazirgi ýaqytta júie pilottyq rejimde jumys istep tur. Platforma kóktemgi dala jumystarynyń barysy, egis qurylymy men kólemi týraly málimetterdi jedel alýǵa múmkindik beredi. Sonymen qatar júie aǵymdaǵy jaǵdaidy baqylaýǵa arnalǵan taldamalyq aqparat qalyptastyrady.
Aldaǵy kezeńde platformanyń fýnktsionaly kezeń-kezeńimen keńeitiledi. Onyń ishinde óndiristik protsesterdi taldaý jáne boljaý úshin jasandy intellekt elementterin engizý josparlanǵan.
Vitse-ministrdiń aitýynsha, bul sheshim derekterdi avtomattandyrýǵa, monitoring dáldigin arttyrýǵa, sheshim qabyldaý ýaqytyn qysqartýǵa jáne jalpy tiimdilikti kóterýge múmkindik beredi.
Sonymen qatar ministrlik tuqym sapasyna baqylaýdy kúsheitip jatyr. Jalpy tuqym qajettiligi 2,3 mln tonnany quraidy. Tekserý qorytyndysy boiynsha barlyq tuqym egis standartynyń 1 jáne 2 synyptaryna sáikes keledi.
Biyldan bastap tuqym qunyn sýbsidiialaýdyń jańa mehanizmi engizilgen. Endi otandyq tuqymdy satyp alǵan jaǵdaida sýbsidiia kólemi 10%-ǵa joǵary bolady.
Úkimet otyrysynda aýyl sharýashylyǵy tehnikasyn jańartý máselesi de kóterildi. Qazirgi ýaqytta eldegi sharýashylyqtarda 133,9 myń traktor, 5,6 myń joǵary ónimdi egis kesheni, 71,4 myń sepkish jáne 188,5 myń topyraq óńdeý quraly bar.
Memlekettik qoldaý sharalarynyń arqasynda 2025 jyldyń qorytyndysy boiynsha aýyl sharýashylyǵy tehnikasy parkiniń jańarý deńgeii 6,5%-ǵa jetken. Biyl bul kórsetkishti 8%-ǵa deiin jetkizý josparlanyp otyr.
Sonymen qatar aýyl sharýashylyǵy tehnikasy parkiniń tozý deńgeii 10%-ǵa tómendegen.
Ministrlik memlekettik qoldaý eń aldymen otandyq óndirýshilerge baǵyttalǵanyn atap ótti. Mysaly, Qazaqstanda shyǵarylǵan tehnikany satyp alý kezinde sýbsidiia kólemi 30%-dy quraidy, al importtyq tehnika úshin bul kórsetkish 15-25% aralyǵynda.
Osynyń nátijesinde bir jyldyń ishinde Qazaqstandaǵy aýyl sharýashylyǵy tehnikasyn óndirý kólemi 22%-ǵa artqan. Biyl óndiris kólemin 9,9 myń birlikke deiin jetkizý josparlanyp otyr.
Sonymen qatar Qazaqstan naryǵyna CLAAS, John Deere jáne Amazone sekildi álemdik óndirýshilerdiń kelýi saladaǵy tehnologiialyq jańǵyrtý protsesin kúsheitip otyr.
Kóktemgi egis jumystaryn ýaqytyly ótkizý úshin biyl jalpy kólemi 402,2 myń tonna jeńildetilgen dizel otyny bólingen. Qazirgi ýaqytta onyń 204,8 myń tonnasy óńirlerge jóneltilgen.
Energetika ministrliginiń málimetinshe, fermerler úshin dizel otynynyń usynylatyn baǵasy litrine 263 teńge bolsa, óńirlik operatorlar arqyly sońǵy baǵa 281 teńgeni quraidy. Bul janarmai quiý beketterindegi baǵadan 49 teńgege nemese shamamen 15%-ǵa arzan.
