Qazaqstannyń birqatar óńirinde egin oraǵy naýqany bastalyp, búgingi kúnge deiin 1,6 million tonna astyq jinaldy, dep habarlaidy dalanews.kz.
Oblys ákimdikteriniń jedel málimetine sáikes, dándi daqyldardyń ortasha ónimdiligi gektaryna 19,1 tsentnerdi qurady. Jinalǵan astyqtyń 1 mln 67 myń tonnasy – bidai, al 456 myń tonnasy – arpa.
Sonymen qatar diqandar 411 myń tonna kókónis, 11,5 myń tonna kartop jáne 228,7 myń tonna baqsha daqyldaryn jinady.
Aýyl sharýashylyǵy ministrliginiń málimetinshe, biyl elimizde jalpy 24,2 million gektar jerge aýyl sharýashylyǵy daqyldary egilgen. Onyń ishinde:
- dándi daqyldar – 15,6 mln gektar;
- maily daqyldar – 5,2 mln gektar;
- mal azyqtyq daqyldar – 3 mln gektar;
- maqta – 173,6 myń gektar;
- uiymdasqan sharýashylyqtardaǵy kartop – 89,9 myń gektar;
- qant qyzylshasy – 23,8 myń gektar.
Vedomstvo egin oraǵy naýqanynyń barysy turaqty baqylaýda ekenin málimdedi.
