Qazaqstan Respýblikasy Máslihat depýtattary men olardyń jaqyn týystarynyń memlekettik tenderlerge qatysýyna zań júzinde tyiym salý týraly petitsiia paida boldy, dep habarlaidy Dalanews.kz.
Petitsiia gosrating.com saitynda paida boldy.
"Qazaqstan Respýblikasynyń azamattary, máslihat depýtattary men olardyń jaqyn týystarynyń memlekettik tenderlerge qatysýyna bailanysty týyndaityn múddeler qaishylyǵyna alańdaýshylyq bildiremiz. Máslihattar jergilikti biýdjetti bekitý jáne onyń atqarylýyn baqylaýda mańyzdy ról atqarady. Sol sebepti depýtattar men olardyń jaqyn týystarynyń osy biýdjet esebinen qarjylandyrylatyn tenderlerge qatysýy sybailas jemqorlyq táýekelderin arttyryp, memleket institýttaryna degen senimdi tómendetedi. Osyǵan orai, ádildik pen ashyqtyqty qamtamasyz etý úshin depýtattar men olardyń jaqyn týystarynyń memlekettik satyp alýlarǵa qatysýyna zań júzinde tyiym salýdy talap etemiz", - delingen petitsiiada.
Petitsiia avtory Berik Alqabai máslihattardyń róli: «Qazaqstan Respýblikasyndaǵy jergilikti memlekettik basqarý jáne ózin-ózi basqarý týraly» zańǵa (2001 jylǵy 23 qańtardaǵy №148-II, 2022 jylǵy 5 qarashadaǵy №157-VII ózgeristerimen) sáikes, máslihattar jergilikti biýdjetti bekitedi jáne onyń oryndalýyn baqylaitynyn, bul depýtattarǵa memlekettik qarajatty bólý men baqylaýǵa múmkindik berip, jeke múddege paidalaný qaýpin arttyratynyn atap ótti.
Berik Alqabaidyń sózinshe, qazirgi zańnamanyń kemshilikteri bar. Ol memlekettik satyp alýlar týraly» zańnyń (2024 jylǵy 1 shildedegi №106-VIII) 6-babynda tenderlerge jetkizýshini tańdaý quqyǵyna ie tulǵalardyń jaqyn týystarynyń qatysýy shektelgenimen, onda máslihat depýtattary arnaiy kórsetilmegenin,bul másele retteýsiz qalǵanyn aitady.
"Sybailas jemqorlyq qaýpi: Qazaqstan Respýblikasy Qarjy ministrliginiń deregi boiynsha, 2019 jyly memlekettik satyp alýlardaǵy jemqorlyqtan kelgen shyǵyn 24,6 milliard teńgeni, al 2020 jyldyń birinshi toqsanynda anyqtalǵan zań buzýshylyqtar 191 milliard teńgeni quraǵan. Depýtattar men olardyń týystarynyń tenderlerge qatysýy osy táýekelderdi eselep kóbeitýi múmkin.
Halyqaralyq standarttar: Qazaqstan EYDU-nyń halyqaralyq investitsiialar men kópultty kásiporyndar týraly deklaratsiiasyna qosylǵan memleket retinde sybailas jemqorlyqqa qarsy ashyqtyq standarttaryn saqtaýǵa mindetti. Depýtattardyń tenderlerge qatysýyna tyiym salý osy ustanymǵa tolyq sáikes keledi", - deidi petitsiia avtory.
Usynylatyn zańnamalyq ózgerister:
«Memlekettik satyp alýlar týraly» zańnyń 6-babyna máslihat depýtattary men olardyń jaqyn týystarynyń (jubaiy, ata-anasy, balalary, baýyrlary) memlekettik tenderlerge qatysýyna tikelei tyiym salatyn norma engizý.
«Jaqyn týystar» uǵymyn Qazaqstan Respýblikasynyń Azamattyq kodeksine sáikes naqty anyqtaý.
Máslihat depýtattary men olardyń týystarynyń múddelerin aldyn ala deklaratsiialaý mindetin bekitip, zań talaptarynyń oryndalýyn baqylaityn táýelsiz organ qurý.
Tyiym buzylǵan jaǵdaida depýtatty mandatynan aiyrý, ákimshilik jáne qylmystyq jaýapkershilik pen aiyppuldar engizý.
Petitsiia qabyldansa nátije qandai bolmaq?
Ashyqtyq deńgeii artady. Múddeler qaishylyǵynyń aldyn alyp, memlekettik resýrstar ádil bólinedi.
Memleket institýttaryna degen halyq senimi nyǵaiady.
Sybailas jemqorlyq táýekeli azaiady, biýdjet qarjysynyń tiimdi jumsalýy qamtamasyz etiledi.
"Biz bilik organdaryn osy petitsiiany nazarǵa alyp, zańnamaǵa tiisti ózgerister engizýge shaqyramyz. Memlekettik satyp alýlardaǵy ádildik pen ashyqtyq úshin bizdiń bastamamyzdy qoldańyz!", - deidi petitsiia avtory.
