قازاقستان رەسپۋبليكاسى ءماسليحات دەپۋتاتتارى مەن ولاردىڭ جاقىن تۋىستارىنىڭ مەملەكەتتىك تەندەرلەرگە قاتىسۋىنا زاڭ جۇزىندە تىيىم سالۋ تۋرالى پەتيسيا پايدا بولدى، دەپ حابارلايدى Dalanews.kz.

پەتيسيا gosrating.com سايتىندا پايدا بولدى. 

"قازاقستان رەسپۋبليكاسىنىڭ ازاماتتارى، ءماسليحات دەپۋتاتتارى مەن ولاردىڭ جاقىن تۋىستارىنىڭ مەملەكەتتىك تەندەرلەرگە قاتىسۋىنا بايلانىستى تۋىندايتىن مۇددەلەر قايشىلىعىنا الاڭداۋشىلىق بىلدىرەمىز. ءماسليحاتتار جەرگىلىكتى بيۋدجەتتى بەكىتۋ جانە ونىڭ اتقارىلۋىن باقىلاۋدا ماڭىزدى ءرول اتقارادى. سول سەبەپتى دەپۋتاتتار مەن ولاردىڭ جاقىن تۋىستارىنىڭ وسى بيۋدجەت ەسەبىنەن قارجىلاندىرىلاتىن تەندەرلەرگە قاتىسۋى سىبايلاس جەمقورلىق تاۋەكەلدەرىن ارتتىرىپ، مەملەكەت ينستيتۋتتارىنا دەگەن سەنىمدى تومەندەتەدى. وسىعان وراي، ادىلدىك پەن اشىقتىقتى قامتاماسىز ەتۋ ءۇشىن دەپۋتاتتار مەن ولاردىڭ جاقىن تۋىستارىنىڭ مەملەكەتتىك ساتىپ الۋلارعا قاتىسۋىنا زاڭ جۇزىندە تىيىم سالۋدى تالاپ ەتەمىز"، - دەلىنگەن پەتيسيادا. 

پەتيسيا اۆتورى بەرىك القاباي ءماسليحاتتاردىڭ ءرولى: «قازاقستان رەسپۋبليكاسىنداعى جەرگىلىكتى مەملەكەتتىك باسقارۋ جانە ءوزىن-وزى باسقارۋ تۋرالى» زاڭعا (2001 جىلعى 23 قاڭتارداعى №148-II، 2022 جىلعى 5 قاراشاداعى №157-VII وزگەرىستەرىمەن) سايكەس، ءماسليحاتتار جەرگىلىكتى بيۋدجەتتى بەكىتەدى جانە ونىڭ ورىندالۋىن باقىلايتىنىن، بۇل دەپۋتاتتارعا مەملەكەتتىك قاراجاتتى ءبولۋ مەن باقىلاۋعا مۇمكىندىك بەرىپ، جەكە مۇددەگە پايدالانۋ ءقاۋپىن ارتتىراتىنىن اتاپ ءوتتى. 

بەرىك القابايدىڭ سوزىنشە، قازىرگى زاڭنامانىڭ كەمشىلىكتەرى بار. ول مەملەكەتتىك ساتىپ الۋلار تۋرالى» زاڭنىڭ (2024 جىلعى 1 شىلدەدەگى №106-VIII) 6-بابىندا تەندەرلەرگە جەتكىزۋشىنى تاڭداۋ قۇقىعىنا يە تۇلعالاردىڭ جاقىن تۋىستارىنىڭ قاتىسۋى شەكتەلگەنىمەن، وندا ءماسليحات دەپۋتاتتارى ارنايى كورسەتىلمەگەنىن،بۇل ماسەلە رەتتەۋسىز قالعانىن ايتادى. 

"سىبايلاس جەمقورلىق ءقاۋپى: قازاقستان رەسپۋبليكاسى قارجى مينيسترلىگىنىڭ دەرەگى بويىنشا، 2019 جىلى مەملەكەتتىك ساتىپ الۋلارداعى جەمقورلىقتان كەلگەن شىعىن 24،6 ميلليارد تەڭگەنى، ال 2020 جىلدىڭ ءبىرىنشى توقسانىندا انىقتالعان زاڭ بۇزۋشىلىقتار 191 ميلليارد تەڭگەنى قۇراعان. دەپۋتاتتار مەن ولاردىڭ تۋىستارىنىڭ تەندەرلەرگە قاتىسۋى وسى تاۋەكەلدەردى ەسەلەپ كوبەيتۋى مۇمكىن.

حالىقارالىق ستاندارتتار: قازاقستان ەىدۇ-نىڭ حالىقارالىق ينۆەستيسيالار مەن كوپۇلتتى كاسىپورىندار تۋرالى دەكلاراسياسىنا قوسىلعان مەملەكەت رەتىندە سىبايلاس جەمقورلىققا قارسى اشىقتىق ستاندارتتارىن ساقتاۋعا مىندەتتى. دەپۋتاتتاردىڭ تەندەرلەرگە قاتىسۋىنا تىيىم سالۋ وسى ۇستانىمعا تولىق سايكەس كەلەدى"، - دەيدى پەتيسيا اۆتورى. 

ۇسىنىلاتىن زاڭنامالىق وزگەرىستەر:

«مەملەكەتتىك ساتىپ الۋلار تۋرالى» زاڭنىڭ 6-بابىنا ءماسليحات دەپۋتاتتارى مەن ولاردىڭ جاقىن تۋىستارىنىڭ (جۇبايى، اتا-اناسى، بالالارى، باۋىرلارى) مەملەكەتتىك تەندەرلەرگە قاتىسۋىنا تىكەلەي تىيىم سالاتىن نورما ەنگىزۋ.

«جاقىن تۋىستار» ۇعىمىن قازاقستان رەسپۋبليكاسىنىڭ ازاماتتىق كودەكسىنە سايكەس ناقتى انىقتاۋ.

ءماسليحات دەپۋتاتتارى مەن ولاردىڭ تۋىستارىنىڭ مۇددەلەرىن الدىن الا دەكلاراسيالاۋ مىندەتىن بەكىتىپ، زاڭ تالاپتارىنىڭ ورىندالۋىن باقىلايتىن تاۋەلسىز ورگان قۇرۋ.

تىيىم بۇزىلعان جاعدايدا دەپۋتاتتى مانداتىنان ايىرۋ، اكىمشىلىك جانە قىلمىستىق جاۋاپكەرشىلىك پەن ايىپپۇلدار ەنگىزۋ.

پەتيسيا قابىلدانسا ناتيجە قانداي بولماق؟ 

اشىقتىق دەڭگەيى ارتادى. مۇددەلەر قايشىلىعىنىڭ الدىن الىپ، مەملەكەتتىك رەسۋرستار ءادىل بولىنەدى.

مەملەكەت ينستيتۋتتارىنا دەگەن حالىق سەنىمى نىعايادى.

سىبايلاس جەمقورلىق تاۋەكەلى ازايادى، بيۋدجەت قارجىسىنىڭ ءتيىمدى جۇمسالۋى قامتاماسىز ەتىلەدى.

"ءبىز بيلىك ورگاندارىن وسى پەتيسيانى نازارعا الىپ، زاڭناماعا ءتيىستى وزگەرىستەر ەنگىزۋگە شاقىرامىز. مەملەكەتتىك ساتىپ الۋلارداعى ادىلدىك پەن اشىقتىق ءۇشىن ءبىزدىڭ باستامامىزدى قولداڭىز!"،  - دەيدى پەتيسيا اۆتورى.