Astanada pilottyq joba aiasynda dári-dármekke qosymsha tólem tetigi engizilip jatyr. Bul týraly Densaýlyq saqtaý ministrligi málimdedi, dep habarlaidy Dalanews.kz.
Vedomstvonyń túsindirýinshe, jańa júie qazirgi tegin dári-dármekpen qamtamasyz etý baǵdarlamasyn tolyqtyrady.
Iaǵni azamattar burynǵydai dárini tegin alýǵa nemese sooplata júiesine qatysatyn dárihanalardan basqa, qymbattaý preparatty tańdap, onyń belgili bir bóligin óz qarajaty esebinen tóleýge múmkindigi bolady.
"Birlesken tólem júiesi naýqasqa tańdaý erkindigin beredi. Dárini tegin alýǵa nemese tiimdirek, zamanaýi preparatty tańdap, onyń baǵasynyń bir bóligin óz moinyna alýǵa bolady.
Halyq tóleitin soma halyqaralyq patentsiz ataýy boiynsha belgilengen shekti baǵa men tańdalǵan dáriniń naqty qunynyń arasyndaǵy aiyrmashylyqtan turady", – delingen ministrlik habarlamasynda.
Tólemdi QR-kody bar elektrondy retsept negizinde eGov mobildi qosymshasyndaǵy “áleýmettik ámiian” arqyly jasaýǵa bolady.
Pilottyq jobany Áleýmettik meditsinalyq saqtandyrý qory ambýlatorlyq dári-dármekpen qamtamasyz etýge arnalǵan biýdjet sheńberinde qarjylandyrady.
Alǵashqy kezeńde qosymsha tólem júiesi arteriialyq gipertenziia siiaqty keń taraǵan aýrý túrine engiziledi. Byltyr ambýlatorlyq dári-dármekpen 3,3 mln adam qamtamasyz etilse, olardyń 1,2 milliony osy dertke shaldyqqandar bolǵan.
"Bul tetik naýqastardyń em qabyldaýǵa beiildiligin arttyryp, olardyń ómir súrý sapasy men uzaqtyǵyn jaqsartýǵa baǵyttalǵan. Ol asqynýlardy, múgedektik pen ólim-jitimdi azaitýǵa yqpal etedi.
Qosymsha tólem júiesi shekteý emes, kerisinshe múmkindik beredi — patsientke tańdaý erkindigin usynyp, dári-dármekpen qamtamasyz etý júiesin anaǵurlym ikemdi ári ashyq etedi", – dep málimdedi Densaýlyq saqtaý ministrligi.
