Qazaqstanda bankter men kredittik biýrolarǵa kórinbeitin bólip tóleý qaryzdaryn esepke alý usynyldy. Ulttyq bank BNPL servisteri arqyly rásimdeletin mindettemeler azamattardyń naqty qaryz júktemesin arttyrǵanymen, jańa nesie berý kezinde qarjy uiymdary ony kórmeýi múmkin ekenin eskertti, dep habarlaidy dalanews.kz.
Másele bankter men mikroqarjy uiymdary emes, BNPL servisteri, saýda oryndary jáne basqa da qarjylyq emes kompaniialar arqyly usynylatyn bólip tóleý qyzmetterine qatysty. Mundai kelisimder azamattyq zańnama aiasynda rásimdeletindikten, olar týraly aqparat kredittik tarihta kórsetilmeýi múmkin.
Sonyń saldarynan adamnyń naqty qaryzy bankke kórinetin somadan kóp bolýy yqtimal. Ulttyq bank muny «jasyryn bereshek» táýekeli dep baǵalap otyr. Óitkeni bir adam bir mezgilde birneshe bólip tóleý qyzmetin paidalanyp, tólem mindettemelerin tabysynan asyryp alýy múmkin.
Osyǵan bailanysty Ulttyq bank pen Qarjy naryǵyn retteý jáne damytý agenttigi BNPL qyzmetteri týraly málimetterdi kredittik biýrolarǵa berýdi qarastyryp jatyr. Sonymen qatar klienttiń tólem qabiletin tekserý, mámileniń tolyq quny men talaptaryn ashyq kórsetý, aiyppuldar men ósimpuldarǵa shekteý qoiý usynylǵan. Retteýshiler bólip tóleýdi qaryz júktemesin esepteý kezinde eskerýdi de kózdep otyr. Bul jaǵdaida birneshe bólip tóleý mindettemesiniń bolýy jańa nesie alý múmkindigine áser etýi yqtimal.
Bólip tóleý naryǵy qazir dúkenderden taýar satyp alýmen ǵana shektelmeidi. Qujatta avtokólik pen jyljymaityn múlikti bólip tóleý, keiin satyp alý quqyǵymen jalǵa alý jáne ekonomikalyq sipaty jaǵynan nesiege uqsaityn ózge de tetikter qarastyrylǵan.
Bul rette zańnamada taǵy bir másele bar. Qazir mundai bólip tóleý men BNPL qyzmetteri boiynsha qalyptasqan bereshek jeke tulǵalardyń sottan tys bankrottyǵy kezinde esepten shyǵarylatyn qaryzdar qataryna kirmeidi. Alaida is júzinde ol azamattyń jalpy mindettemeleriniń edáýir bóligin quraýy múmkin.
Ázirge bul talaptar kúshine engen joq. Ulttyq bank usynystardy 2026 jylǵy 3 qarashaǵa deiin qoǵamdyq talqylaýǵa shyǵardy. Retteýshiniń túsindirýinshe, bastamanyń maqsaty – bólip tóleý qyzmetterin shekteý emes, naryqtyń naqty kólemin anyqtap, tutynýshylardy qorǵaýdyń eń tómengi talaptaryn belgileý.
Eger usynystar qabyldansa, bólip tóleý qaryzy qarjy júiesine kórinip, azamattyń jańa nesie alý múmkindigin baǵalaý kezinde esepke alynýy múmkin.
