Qazaqstanda kásipkerlikti nesielendirý birneshe jylǵa sozylǵan tómendeýden keiin qaita jandandy. Qarjy naryǵyn retteý jáne damytý agenttiginiń tóraǵasy Mádina Ábilqasymovanyń aitýynsha, bankter ekonomikany belsendi qarjylandyrýǵa kóshken, dep habarlaidy dalanews.kz.
2017–2020 jyldar aralyǵynda naqty sektorǵa berilgen nesie kólemi 16,1 paiyzǵa qysqarǵan. Alaida 2021 jyldan bastap kórsetkish turaqty ósimge shyqty.
2021–2025 jyldary bizneske berilgen nesie portfeli jyl saiyn orta eseppen 15,3 paiyzǵa ulǵaiǵan. Nátijesinde 2020 jyldan beri onyń kólemi eki eseden astam ósip, 16,1 trln teńgege jetti. Al nesie alǵan kásipkerlerdiń sany 57 myńnan 597 myńǵa deiin, iaǵni on eseden astam kóbeidi.
"Bizneske beriletin nesieniń birneshe jyl boiy qysqarý úrdisi toqtady. Bankter ekonomikany qaitadan belsendi qarjylandyra bastady", – dedi agenttik tóraǵasy.
Sonymen qatar bankterdiń iri investitsiialyq jobalardy qarjylandyrý múmkindigi keńeitilgen. Shaǵyn jáne orta bizneske beriletin nesieler men sindikattalǵan qaryzdar boiynsha táýekel salmaǵy 50 paiyzǵa deiin tómendetildi. ShOB-ty qoldaýǵa arnalǵan kepildik qory qurylyp, sindikattalǵan nesieleýdiń quqyqtyq negizi qalyptastyryldy.
"Báiterek" holdingimen birlesip jalpy quny 10,7 trln teńge bolatyn investitsiialyq jobalar pýly jasaqtalǵan. Onyń ishinen 2,5 trln teńgege baǵalanǵan toǵyz joba maquldandy.
Kelesi kezeńde bankterdiń investitsiialyq jobalarǵa qatysý aýqymyn keńeitip, tikelei memlekettik qarjylandyrýdan jeke bank kapitalyn tartýǵa birtindep kóshý josparlanyp otyr.
Mádina Ábilqasymovanyń sózinshe, bank sektory saýyqtyrý kezeńinen ótip, jetkilikti turaqtylyq qoryn qalyptastyrǵan. Endigi mindet – osy resýrsty biznesti, jeke investitsiialardy jáne ekonomikalyq ósimdi qarjylandyrýǵa baǵyttaý.
