Qazirgi ýaqytta Qazaqstanda ekinshi deńgeili toǵyz bank taratý protsesinde tur, dep habarlaidy Dalanews.kz digitalbusiness.kz saityna silteme jasap.
Jabylatyn qarjy uiymdarynyń qatarynda: «Valiýt-Tranzit Bank», «Kazinvestbank», Delta Bank, Qazaq Banki, Eksimbank Kazahstan, Bank Astany, Tengri Bank, AsiaCredit Bank, Capital Bank Kazakhstan bar.
Bul bankter boiynsha ótemaqy tóleý merzimi aiaqtalǵan, al talap etilmegen qarajat salymshylardyń Biryńǵai jinaqtaýshy zeinetaqy qoryndaǵy jeke shottaryna aýdaryldy. Degenmen, merzimdi ótkizip alǵan, biraq soǵan negiz bolatyn sebepteri bar salymshylar ótemaqy alý úshin áli de ótinish bere alady.
Qazaqstannyń depozitterge kepildik berý qory (DKBQ) «dáleldi sebepter» boiynsha ótinish qabyldaýdy jalǵastyryp jatyr. 2025 jylǵy 1 naýryzdaǵy jaǵdai boiynsha qor 40 salymshyǵa 60 mln teńgeden astam qarajat tólegen. Bul tólemder salymshylardyń merzimnen keshigýine sebep bolǵan dáleldi qujattardy jeke tártippen qaraý nátijesinde jasaldy. Mundai sebepterge mynalar jatady:
- áskeri qyzmetke shaqyrylý;
- Qazaqstan aýmaǵynan tys jerde bolý;
- muragerlik rásimdeý;
- bas bostandyǵynan aiyrý oryndarynda bolý;
- sot belgilegen ózge de mán-jailar.
Ótemaqy alý quqyǵyn rastaý úshin osy sebepterdiń árqaisysyn dáleldeitin qujattar usynylýy tiis. Mysaly, áskeri qyzmet úshin, áskeri bólimniń anyqtamalary, al elden tys bolǵan jaǵdaida, pasporttaǵy shekaradan ótkeni týraly belgiler.
Mańyzdy jait: usynylǵan qujattar salymshy ótinish berý merzimin ótkizip alǵan tolyq kezeń boiy jaǵdaidyń úzdiksiz bolǵanyn dáleldeýi tiis (bank litsenziiasynan aiyrylǵan kúnnen bastap 1 jyl ishinde). Ótinishti DKBQ-ǵa jeke baryp nemese poshtamen jiberýge bolady. Poshta arqyly jibergende qoltańba notarialdy rastalýy qajet.
Qor ótinishterdi 5 jumys kúni ishinde qaraidy. Ótinish maquldansa, aqsha salymshynyń bank shotyna aýdarylady. Qanaǵattandyrylmaǵan jaǵdaida qor túsindirý men sáikessizdikterdi joiý boiynsha usynystar beredi.
Salymshylardyń basym bóligi ótemaqysyn alyp úlgergen: 148 myń adamǵa 113 mlrd teńgeden astam qarajat qaitarylǵan. Bul mindettemelerdiń 98%-y.
