Saýda jáne integratsiia ministrligi azamattardyń shaǵymdaryna bailanysty benzin sapasyn tekserýdi jalǵastyryp jatyr. Zertteý janarmaidyń zaýyttan bastap janarmai quiý stantsiialaryna deiingi barlyq tizbegin qamtidy, dep habarlaidy dalanews.kz.
Ministrlik málimetinshe, qazirgi ýaqytta azamattardan túsken 12 ótinish qaralýda. Onyń toǵyzy Astanadan, bireýi Pavlodardan jáne ekeýi Soltústik Qazaqstan oblysynan túsken.
Pavlodar oblysy boiynsha Saýda jáne integratsiia ministrliginiń Tehnikalyq retteý jáne metrologiia komitetiniń aýmaqtyq departamenti táýelsiz zerthanaǵa Pavlodar munai-himiia zaýytynan tikelei alynǵan benzinniń arbitrajdyq synamalaryn tapsyrdy.
Sonymen qatar Sinoil, QazaqOil jáne Helios qospalary bar otyn úlgileri de jeke zerttelip jatyr. Zertteý nátijeleri bir apta ishinde belgili bolady dep kútilýde.
Budan bólek, ministrlik 17 janarmai quiý stantsiiasynda baqylaý satyp alýyn júrgizgen. Onyń beseýi Almatyda, beseýi Almaty oblysynda, altaýy Abai oblysynda jáne bireýi Jambyl oblysynda ornalasqan. Qazir alynǵan janarmai úlgilerine zerthanalyq synaq júrgizilip jatyr.
Ministrliktiń málimetinshe, tekserý tek benzin óndiriletin zaýyttarmen shektelmeidi. Mamandar otynnyń tutynýshyǵa satylǵanǵa deiingi barlyq kezeńdegi sapasyn baǵalaidy.
«Tekserý aiasynda synamalar barlyq tizbek boiynsha, onyń ishinde munai bazalarynda da alynady. Bul úshin qajetti normativtik-tehnikalyq qujattar, memlekettik standarttar jáne synaq zerthanalary bar», – dep habarlady Saýda jáne integratsiia ministrligi.
Eger benzinniń tehnikalyq reglament talaptaryna sáikes kelmeitini anyqtalsa, zańnamaǵa sáikes sharalar qabyldanady. Onyń ishinde talapqa sai emes janar-jaǵarmai materialdaryn satýǵa tyiym salý jáne ainalymnan alyp qoiý qarastyrylǵan.
Ministrlik zertteý jumystarynyń nátijeleri týraly jurtshylyqqa qosymsha aqparat beretinin málimdedi.
