Jyl basynan beri Qazaqstanda turǵyn úidi satyp alý-satý qarqyny tómendep ketken. Byltyrǵy kórsetkishpen salystyrǵanda tek naýryz ben shildede ósim tirkelgen, al keiin satylym qaita azaiǵan, dep habarlaidy dalanews.kz.
Ulttyq statistika biýrosy qyrkúiektegi turǵyn úidi satyp alý-satý mámileleriniń sany týraly jańa derek jariialady. Málimetke qaraǵanda, baspana saýdasy odan ári báseńdegen.
2026 jylǵy qyrkúiekte turǵyn úidi satyp alý-satý boiynsha tirkelgen mámileler sany 35 406 boldy. 2026 jylǵy tamyzben salystyrǵanda (35 807) mámileler sany 1,1 paiyzǵa azaiǵan.
Qyrkúiekte turǵyn úi eń kóp satylǵan óńirler:
- Almatyda 7 248 mámile nemese jalpy kólemniń 20,5 paiyzy;
- Astanada 6 119 mámile nemese jalpy kólemniń 17,3 paiyzy;
- Qaraǵandy oblysynda 2 540 mámile nemese jalpy kólemniń 7,2 paiyzy.
Al eń az satylym Ulytaý oblysynda tirkelgen. Munda bar bolǵany 280 mámile jasalǵan. Bul jalpy kórsetkishtiń 0,8 paiyzyna teń.
Qyrkúiekte satylǵan turǵyn úilerdiń 76,5 paiyzy páterlerge tiesili. Bir aida 27 096 páter boiynsha mámile jasalǵan. Bul tamyzben salystyrǵanda 623 mámilege az. Páter saýdasy negizinen Almaty, Astana qalalarynda jáne Qaraǵandy oblysynda jaqsy júrgen. Satyp alýshylar arasynda bir bólmeli páterlerge suranys joǵary: mundai baspanalar boiynsha 10 434 mámile tirkelgen.
Al jeke úiler boiynsha qyrkúiekte 8 310 mámile jasalǵan. Bul tamyzdaǵy kórsetkishten 222 mámilege kóp. Aqtóbe, Túrkistan jáne Shyǵys Qazaqstan oblystarynda ósim baiqalsa, Qaraǵandy, Pavlodar, Ulytaý oblystarynda satylym tómendegen.
