Qazaqstanda avtomobil ónerkásibine qajetti jańa kadrlardy daiarlaý úshin 31 jańa mamandyq engizilip, taǵy 22 qoldanystaǵy mamandyq jańartylady, dep habarlaidy dalanews.kz.
Bul týraly Úkimet otyrysynda Ǵylym jáne joǵary bilim ministri Saiasat Nurbek málimdedi, dep habarlaidy Dalanews.
Ministrdiń aitýynsha, elde jańa kásipter men quzyretterdiń 9 salalyq jáne 20 óńirlik atlasy ázirlengen. Onyń ishinde «Mashina jasaý», «Kólik jáne logistika» salalyq atlastary, sondai-aq Qaraǵandy men Qostanai oblystarynyń óńirlik atlastary avtomobil jasaý salasyn qamtidy.
«Nátijesinde 31 jańa mamandyq qalyptasyp, 22 qoldanystaǵy mamandyq transformatsiialanady. Sonyń negizinde joǵary oqý oryndary bilim berý baǵdarlamalaryn jańartyp jatyr», – dedi Saiasat Nurbek.
Ministrdiń sózinshe, eńbek naryǵyndaǵy naqty suranysty anyqtaý úshin 73 myń kásiporyn arasynda aýqymdy saýalnama júrgizilgen. Onyń ishinde 92 kásiporyn avtomobil ónerkásibi salasyna tiesili.
Zertteý nátijesine sáikes, aldaǵy úsh jylda avtokólik ónerkásibine 10 myńnan astam injenerlik jáne jumysshy maman qajet bolady.
Úkimettiń málimetinshe, jańa mamandyqtardy engizý men bilim berý baǵdarlamalaryn jańartý avtomobil jasaý salasynda bilikti kadr tapshylyǵyn azaityp, óndiristiń jańa tehnologiialarǵa beiimdelýine múmkindik beredi.
